काठमाडौं– भारतको जम्मू-कश्मीरस्थिगत पहलगामको बैसरन उपत्यका क्षेत्रमा आतंकवादी आक्रमण भएको छ । उक्त आक्रमणमा एक जना नेपाली पर्यटक सुदिप न्यौपानेसहित २७ जनाको ज्यान गएको भारतीय सञ्चार माध्यमहरुले दावी गरेका छन् । यो आक्रमणलाई २०१९ को पुलवामा आक्रमणपछि जम्मू-कश्मीरमा सबैभन्दा ठूलो आतंकवादी हमला भएको बताइन्छ । आतंककारीहरूले मंगलवार पर्यटकहरूमाथि गोली चलाएका थिए, जसमा २७ जनाको ज्यान गएको छ । ज्यान गुमाउनेहरूमा एक जना नेपाली पर्यटक तथा एक जना यूएईका पर्यटकसहित २ जना स्थानीय नागरिक छन् । बाँकी पर्यटकहरू उत्तर प्रदेश, गुजरात, महाराष्ट्र, कर्नाटक, तमिलनाडु तथा ओडिशाका हुन् ।

घटना मंगलवार दिउँसो करीब ३ बजेको समयमा पहलगामको बैसरन उपत्यकामा भएको हो । मिडिया रिपोर्टका अनुसार आतंककारीहरूले उत्तर प्रदेशबाट आएका शुभम द्विवेदीसँग नाम सोधी उनको टाउकोमा गोली हानेका थिए । शुभमको दुई महिनाअघि मात्र विवाह भएको थियो र उनी हनिमुन मनाउन पहलगाम गएका थिए । आतंककारीहरूले अन्य पर्यटकहरूलाई पनि गोली हानी फरार भए । उक्त आक्रमणको जिम्मेवारी लश्कर-ए-तैयबाले लिएको छ । प्रारम्भमा प्रशासनले एक जनाको मात्र मृत्यु भएको दावी गरेको थियो, तर झन्डै ४ घण्टापछि समाचार एजेन्सीहरूले २६ जनाको मृत्यु भएको पुष्टि गरेका हुन् । घटनामा २० भन्दा बढी घाइते छन् । आक्रमणपछि सुरक्षाबलले पहलगामको आक्रमणस्थल घेराबन्दी गरेका छन् र हेलिकप्टरबाट निगरानी गरिँदैछ ।

यसैबीच, भारतको जम्मु काश्मिरमा भएको आतंकवादी हमलाको नेपालले निन्दा गरेको छ । एक नेपालीसहित २६ पर्यटक जम्मु काश्मिरको पहलगाममा भएको हत्या भएको भोलिपल्ट नेपालले निन्दा गरेको हो । राष्ट्रपति रामचन्द्र पौडलले भारतको जम्मू–काश्मीरस्थित पहलगाममा भएको आतंकवादी हमलाप्रति दुःख व्यक्त गरेका छन् । मंगलवार पहलगाममा घुम्न गएका एक नेपाली पर्यटकसहित २७ जनाको सामुहिक हत्या गरिएको घटनाप्रति राष्ट्रपति पौडेलले निन्दा गरेका हुन् । ‘निर्दोष व्यक्तिलाई लक्षित गरी गरिएको यस्तो हिंसात्मक कार्य पूर्णतया निन्दनीय छ’, उनले सामाजिक सञ्जालमार्फत भनेका छन् । राष्ट्रपति पौडेलले प्रियजन गुमाएका परिवारहरूप्रति समवेदना र घाइतेहरूको शीघ्र स्वास्थ्यलाभको कामनासमेत गरेका छन्

यसैगरी, प्रधानमन्त्री केपी शर्मा ओलीले पनि उक्त आक्रमणको निन्द गरेका छन् । ‘पहलगाममा भएको आतंकवादी हमलाका पीडितहरूप्रति गहिरो समवेदना, नेपाल भारतको साथमा दृढताका साथ खडा छ र कुनै पनि र सबै आतंकवादी कार्यको कडा निन्दा गर्दछ,’ प्रधानमन्त्री केपी शर्मा ओलीले भनेका छन– ‘पीडितहरूमध्ये एक नेपाली नागरिकको रिपोर्ट प्रमाणित गर्न घनिष्ठ समन्वय स्थापना गरिएको छ र आवश्यक सबै सहयोग उपलब्ध गराइने छ ।’ उक्त आतंकवादी आक्रमणको विश्वभरीवाट निन्दा भइरहेको छ ।