अष्ट्रेलियामा जन्मे हुर्केका नेपाली बालबालिकाहरु लाई नेपाली भाषा पढ्न लेख्न लेख्न सिकाउने, नेपाली कला संस्कृति, भेष भुषा  र रितिरिवाजको पहिचान दिने उदेश्यले गोरखा नेपाली समुदाय (GNC) तथा गुठी अष्ट्रेलियाको पहलमा सन् २०१० मा स्थापित शब्दमाला नेपाली भाषा विद्यालयको १६औँ वार्षिक साधारण सभा ६ डिसेम्बरका दिन ग्रयानभिलमा सम्पन्न भएको छ । साधारण सभामा शिक्षक/शिक्षिका, अभिभावक, स्वयंसेवक, सल्लाहकार, पूर्व पदाधिकारी तथा विभिन्न शाखाका प्रतिनिधिहरूको उल्लेखनीय उपस्थिति थियो ।

सभाले आगामी शैक्षिक वर्ष २०२६-२०२७ का लागि नयाँ व्यवस्थापन समिति गठन गरेको छ । पूर्व अध्यक्ष विक्रम शर्मा खरेल, अर्चना घले गुरुङ तथा पूर्व सचिव बिन्ध्या सुब्बाको संयोजनमा रहेको निर्बाचन समितिले नयाँ  नयाँ व्यवस्थापन समितिको घोषणा गरेको थियो । निर्बाचन समितिका अनुसार नब गठित व्यवस्थापन समितिको अध्यक्ष: दीपक लामिछाने, उपाध्यक्ष: विजय राज रेग्मी, सचिव: रामजी कोइराला, कोषाध्यक्ष: टीका रेग्मी, जनसम्पर्क अधिकृत: दिपेन्द्र बानिया, शैक्षिक संयोजिका: अन्नु मिश्र घिमिरे र शैक्षिक सह-संयोजिका: सुष्मिता दाहाल रहेका छन् । यसै गरि शाखा संयोजक/संयोजिकाहरू मा क्याम्प्सी शाखा: ईश्वर गौतम र सुदिप गौतम, ग्रानभिल शाखा:  निशा पन्थ र प्रकाश सेढाईं, म्याक्वेरी फिल्ड शाखा: डा. अर्जिना श्रेष्ठ र दुर्गा पाण्डे, द पोन्ड्स शाखा: हरि पौडेल र नवीन घले, वाइटारा शाखा: पदम राना मगर, न्युकासल शाखा: राजेश खड्का र चक्र घिमिरे र  पेनरिथ शाखा: सुरज श्रेष्ठ चयन भएका छन्।

साधारण सभा विद्यालयका निबर्तमान अध्यक्ष विष्णु घिमिरेको अध्यक्षतामा सम्पन्न भएको थियो भने  उपाध्यक्ष विजय राज रेग्मीले  स्वागत मन्तव्यराख्नु भएको थियो । विद्यालयका सचिव दीपक लामिछाने सञ्चालन गर्नुभएको उक्त कार्यक्रममा प्रमुख अतिथिका रूपमा न्यू साउथ वेल्स फेडेरेसन अफ कम्युनिटी ल्याङ्ग्वेज स्कुल्सकी कार्यकारी सदस्य, शब्दमालाकी संस्थापक सदस्य, पूर्व सचिव तथा वर्तमान सल्लाहकार बिन्ध्या सुब्बा उपस्थित रहनुभएको थियो । त्यसैगरी पूर्व अध्यक्ष तथा हालका सल्लाहकार विक्रम शर्मा खरेल, अर्चना घले गुरुङ, पूर्व सचिव तथा हालका सल्लाहकार मुकेश बुढाथोकी, पूर्व सल्लाहकार तथा पूर्व अध्यक्ष समिन्द्र श्रेष्ठ, र पूर्व शाखा संयोजक तथा विधान संशोधन समितिका संयोजक डा. नन्द राम आर्याल विशेष अतिथिको रूपमा सहभागी हुनुहुन्थ्यो।

अध्यक्ष विष्णु घिमिरेले आफ्नो कार्यकालको प्रतिवेदन प्रस्तुत गर्दै दुई वर्षको अवधिमा विद्यालयले उल्लेखनीय प्रगति गरेको बताउनुभयो । हाल विद्यालय न्यू साउथ वेल्सका ८ विभिन्न स्थानमा सञ्चालन भइरहेको र ४३० भन्दा बढी विद्यार्थीले नेपाली भाषा अध्ययन गरिरहेको जानकारी दिनुभयो । घिमिरेका अनुसार दोस्रो पुस्ताका बालबालिकालाई मातृभाषासँग जोडिराख्नु नै बिद्यालयको मुख्य लक्ष्य रहेको र त्यो लक्ष्य पूरा गर्न शिक्षक, अभिभावक र सम्पूर्ण कार्यसमितिको सामूहिक प्रयास निर्णायक रह्यो । साथै विद्यालयको आर्थिक अवस्था सन्तुलित रहेको र पारदर्शिता कायम राखिएको पनि घिमिरेले उल्लेख गर्नुभयो । सभामा सचिव दीपक लामिछानेले सचिवीय प्रतिवेदन प्रस्तुत गर्दै अध्यक्ष विष्णु घिमिरे र सह-सचिव राजन सितौलालाई निरन्तर सहयोगका लागि विशेष धन्यवाद व्यक्त गर्नुभयो । साथै विद्यालय व्यवस्थापनका सम्पूर्ण पदाधिकारी, सदस्य, सल्लाहकार, शिक्षक/शिक्षिका,अभिभावक, विद्यार्थी, सहयोगी विद्यालय तथा न्यू साउथ वेल्स फेडेरेसन अफ कम्युनिटी ल्याङ्ग्वेज स्कुल्सलाई सहयोग र साथका लागि धन्यवाद व्यक्त गर्नुभयो।

जनसम्पर्क अधिकृतको प्रतिवेदन बिजेन्द्र थपलियाले प्रस्तुत गर्नुभयो भने शैक्षिक प्रतिवेदन शैक्षिक सह-संयोजिका अन्नु मिश्र घिमिरेले प्रस्तुत गर्नुभयो । अहिले विद्यालयमा ६० जना शिक्षक/शिक्षिका रहेका मध्ये ३० जना तालिम प्राप्त प्रशिक्षकहरूले विद्यार्थीलाई अध्यापन गराइरहेको जानकारी दिनुभयो । सभामा विभिन्न शाखाका संयोजक/संयोजिकाहरूले आफ्ना शाखाको वार्षिक प्रतिवेदन प्रस्तुत गरेका थिए जसमा क्याम्प्सीबाट ईश्वर गौतम, ग्रानभिलबाट मल्लिका शर्मा, म्याक्वेरी फिल्डबाट डा. अर्जिना श्रेष्ठ, द पोन्ड्सबाट हरि पौडेल, वाइटाराबाट रामजी कोइराला, न्युकासलबाट चक्र घिमिरे तथा पेनरिथबाट दिपेन्द्र बानिया सहभागी हुनुहुन्थ्यो।
कार्यक्रमको अन्त्यमा विद्यालयका लागि वर्षभरि योगदान गर्ने सांस्कृतिक प्रशिक्षक/प्रशिक्षिका तथा स्वयंसेवकहरूलाई प्रशंसा पत्र प्रदान गरियो । साथै शब्दमालाका विद्यार्थी तथा सांस्कृतिक प्रशिक्षिकाहरू आकृति घिमिरे, श्रेया पोखरेल, अलिसा के.सी. र रियाना पौडेलले मनमोहक सांस्कृतिक प्रस्तुति गरेका थिए।
कार्यक्रम सम्पन्न गर्दै अध्यक्ष घिमिरेले विद्यालयको प्रगति, भविष्यका योजनाहरू र समुदायले देखाइरहेको निरन्तर सहयोगप्रति धन्यवाद व्यक्त गर्नुभयो।हाल शब्दमाला नेपाली भाषा विद्यालय, अष्ट्रेलियाको न्यू साउथ वेल्सका आठ स्थानमा सञ्चालन हुँदै आएको छ र करिब ४३० जना नेपाली मूलका बालबालिकालाई नेपाली भाषा, कला र संस्कृतिको शिक्षा प्रदान गर्दै आएको छ। अष्ट्रेलियामा बसोबास गर्ने नेपाली समुदायका लागि यो विद्यालय नेपाली भाषा, कला र संस्कृति संरक्षण एवं पुस्तान्तरणको महत्वपूर्ण केन्द्रका रूपमा विकसित हुँदै आएको छ।