काठमाडौं- मदन पुरस्कारपछि प्रतिष्ठित र ठूलो पुरस्कार रासी रहेको पद्म श्री साहित्य पुरस्कार समितिले उत्कृष्ट ५ कृतिको नाम मनोनयन गरेको छ । २०७२ सालमा उत्कृष्ट ठहर गरिएका ती कृतिहरुको नाम गोप्य जुरी मेम्बरहरुले गरेका हुन् ।

गएको वर्ष निकै ख्याती कमाएको गैरआख्यान कृति गिरिश गिरीको ‘बिरगंज’ पद्मश्री पुरस्कारको मनोनयनमा परेको छ । त्यसैगरी कथा लेखनमा नयाँ शैली भित्राएको रामलाल जोशीको ‘ऐना’ पनि मनोनयनमा परेको छ । लेखनमा नयाँ डिजाइन भित्राउने कुमार नगरकोटीको ‘मिस्टिका’ र कविता लेखनमा उचाइ प्राप्त गरेका भूपिनको ‘सुप्लाको हवाइजहाज’ पनि यो सूचीमा अटाएको छ ।

त्यसैगरी महाभारतलाई नयाँ शैलीमा पुर्नलेखन गर्न सफल निलम कार्की ‘निहारिका’ ले पनि पद्म श्री पुरस्कारको सूचीमा आफूलाई पार्न सफल भएकी छिन् । ऐना र चीररहण यसअघि मदन पुरस्कारको सुचीमा पनि पर्न सफल भएको थियो ।

मनोनयमा परेका सबैजसो कृति आफ्नो ठाउँमा बेजोड स्थान बनाएको ठहर समीक्षकहरुले गरेका छन् । विश्वका चर्चित सहरको बायोग्राफी लेख्ने चलनलाई नपालीमा भित्राएको कारणले ‘बिरगञ्ज’ मनोनयनमा परेको हुनसक्ने चर्चित समीक्षक राम लोहनीले बताए । नोवेल पुरस्कार प्राप्त लेखक ओरान पामुकको ‘स्तानबुल’ पुस्तकपछि स्ताम्बुलमा पर्यटकहरुको संख्या ह्वात्तै पढेको थियो । संसारका प्रशिद्ध सहरहरुका बारेमा लेख्ने पुरानो चलन छ ।

पद्मश्री पुरस्कारको मनोनयनमा परेको नगरकोटीको ‘मिस्टिका’ कल्पनाशीलताको उचाईमा पुगेका कारण मनोनयनमा परेको बताइन्छ । नेपाली साहित्यमा यस किसिमको लेखन यसअघि नआएको कारण पनि निर्णायकको नजरमा परेको अनुमान समीक्षकहरुले गरेका छन् ।

यता ‘सुप्लाको हवाइजहाज’ बाट मनोनयनमा परेका कवि भूपिन कविता लेखनमा चर्चित नाम हो । समाकालीन कविहरुमा कुनै राजनीतिक दल नजिक नरही आजको अवस्था वर्णन गरेकै कारण उनको कविता सूचीमा परेको जनाइएको छ । ऐना र चीरहरण भने यसअघि मदन पुरस्कारका निर्णायकहरुले पनि रुचाएका कारण यसअघि नै चर्चित भैसकेका छन् ।