काठमाडौं— नेपाली कांग्रेसको भ्रातृ संगठन नेपाल विद्यार्थी संघ (नेवि संघ) को ११औं महाधिवेशन काठमाडौंमा प्रारम्भ भएको छ । करिव नौ वर्षपछि नेवि संघले महाधिवेशन आयोजना गरेको हो । संघको १०औं महाधिवेशन २०६४ जेठमा चितवनमा भएको थियो ।
आज आइतबार दिउँसो १ बजेपछि नेपाली कांग्रेसका सभापति तथा पूर्व प्रधानमन्त्री शेरबहादुर देउवाले काठमाडौंको भृकुटीमण्डपमा तीन दिने यो महाधिवेशन उद्घाटन गर्ने कार्यक्रम छ ।
उद्घाटन सत्रलाई पार्टी सभापति देउवासहित वरिष्ठ नेता रामचन्द्र पौडेल, नेताहरु प्रकाशमान सिंह, नेता कृष्णप्रसाद सिटौला, विमलेन्द्र निधिसहितका शीर्ष नेताले सम्वोधन गर्ने कार्यक्रम छ । यसका साथै विभिन्न क्रियाशील विद्यार्थी संघठनका नेताहरुले महाधिवेशनको सफलताको शुभकामना दिने कार्यक्रम छ ।
महाधिवेशनमा देशभरीका जिल्ला, क्याम्पस तथा विदेशस्थित सम्पर्क समितिका गरी करिव तीन हजार ४ सय प्रतिनिधिले भाग लिादैछन् । महाधिवेशनमा भाग लिन अधिकांश प्रतिनिधि काठमाडौं आइसकेको नेवि संघले जनाएको छ ।
नेपाली कांग्रेसको आन्तरिक जीवनलाई समेत महाधिवेशनले नयाँ गति दिने हुँदा यसलाई पार्टी नेतृत्व तथा आम सर्वसाधारणले उत्सुकतापूर्वक नियालिरहेका छन् । महाधिवेशनको पहिलो दिन उद्घाटन सत्रमा सीमित हुने । भोलि सोमबार बन्द शत्र तथा पर्सी मंगलबार नयाँ नेतृत्वका लागि निर्वाचन हुने कार्यक्रम रहेको छ ।
बन्द शत्रमा संघका अध्यक्ष रञ्जित कर्णले राजनीतिक तथा सांगठनिक, शैक्षिक तथा आर्थिक प्रतिवेदन गरी तीनवटा प्रतिवेदन पेस गर्ने कार्यक्रम छ ।