काठमाडौं— नेपाल विद्युत प्राधिकरणले हिजो आईतबार काटेको महेन्द्र मञ्जिलको बिजुलीको लाइन आज सोमबार जोडिदिएको छ ।

२०६८ सालदेखि हालसम्म ४७ लाख ६४ हजार रुपैयाँ बक्यौता पुग्दा पनि विद्युत महसुल नतिरेको भन्दै आइतबार प्राधिकरणले महेन्द्र मञ्जिलको लाइन काटिदिएको थियो ।

नारायणहिटी दरवारभित्र रहेको महेन्द्र मञ्जिलमा पूर्व मुमाबडामहारानी रत्न राज्यलक्ष्मीदेवी शाह बस्दै आएकी छन् । त्यहाँ लोडसेडिङको समयमा पनि बत्ती जाँदैनथ्यो ।

संस्कृति तथा पर्यटन मन्त्रालयले विद्युत महसुल भुक्तानीका लागि अर्थ मन्त्रालयबाट रकम निकासाका क्रममा रहेको भन्दै लाइन जोडिदिन प्राधिकरणलाई पत्र पठाएको थियो । मन्त्रालयले केही समयभित्रै बक्यौता रकम भुक्तानी गर्ने प्रतिवद्धता जनाएकाले लाइन जोडिएको प्राधिकरणले जानकारी दियो । महेन्द्र मञ्जिलमा लाइन काटिएको भन्दै राप्रपा नेपालले विरोध जनाएको थियो ।

सरकारले नारायणहिटी संग्रहालय अन्तरगतका सबै संरचनामा बालिने बत्तिको महसुल आफैंले तिर्दै आएको छ तर, पूर्व बिशिष्टको हैसियतले सरकारले उपलब्ध गराएको महेन्द्र मञ्जिलको महसुल पनि सरकारले तिर्ने प्रतिवद्धता जनाएको थियो ।

ऊर्जामन्त्री जनार्दन शर्मा प्रभाकरको निर्देशनअनुसार भदौ १ गतेदेखि आजसम्म प्राधिकरणले देशभर ५ करोड ६८ लाख रुपैयाा बक्यौता भएका ४ सय ६४ ग्राहकको लाइन काटेको छ ।