काठमाडौं— अभिनेत्री प्रियंका कार्कीले फागुन १५ गते शनिवार जन्मदिन मनाउने क्रममा दुई भिन्न उपहार पाएकी छिन् । प्रियंकाको जन्मदिन पारेर उनको पछिल्लो चलचित्र ‘हाउ फन्नी’ को ट्रेलर सार्वजनिक भएको छ भने दीपकराज गिरी तथा दीपाश्री निरौलाले पनि प्रियंकालाई आफ्नो आगामी चलचित्र ‘छक्का पञ्जा’ मा अभिनेत्रीको रुपमा अनुबन्ध गरेका छन् ।

काठमाडौंमा एक कार्यक्रम आयोजना गर्दै चलचित्र युनिटले ट्रेलर सार्वजनिक गरेको हो । समारोहमा प्रियंकाले आफ्नो २८ औं जन्मदिनको केक काटेकी थिइन् । प्रियंकालाई केक काट्न चलचित्र विकास बोर्डका अध्यक्ष राजकुमार राई, निर्देशक समाजका अध्यक्ष दिनेश डिसी, कलाकार संघका अध्यक्ष राम केसर बोगटी र प्राविधिक संघका अध्यक्ष पुस्कर लामाले साथ् दिएका थिए । समारोहमा लचचित्रका दुई गीत प्रिमियर गरिएको थियो । यो चलचित्र आगामी वैशााख १० गते प्रदर्शन हुनेछ ।

मिस नेपाल—२००२ माल्भिका सुब्बा यही चलचित्रमार्फत निर्मात्रीको रुपमा पदार्पण गरेकी हुन् । निलु डोमा शेर्पा यही चलचित्रबाट निर्देशनमा डेब्यू गर्दैछिन् । यो चलचित्रमा दयाहाङ राई, प्रियंका कार्की, निशा अधिकारी, केकी अधिकारी, अनुपविक्रम शाही, विजय बराल, सन्दिप क्षेत्री, शिशिर राणा आदि कलाकारले अभिनय गरेका छन् ।