विश्वमा नेपालमा एउटा त्यस्तो देशको रुपमा चिनिएको छ जहाँ कुनै एउटा सरकार जम्मा ९ महिनामात्र चल्छ । अघिल्लो महिना माओवादी केन्द्रका अध्यक्ष पुष्पकमल दाहाल प्रचण्डको नेतृत्वमा गठन भएको सरकारको आयु नै जम्मा ९ महिनाको छ । त्यसअघि केपी ओली नेतृत्वको सरकार पनि ठिक ९ महिनामा विगठन भयो । अहिले गठन भएको प्रचण्ड नेतृत्वको सरकारलाई ठिक ९ महिनापछि नेपाली कांग्रेसका सभापति शेरबहादुर देउवाले विस्थापित गर्ने निश्चित प्राय: छ । यसरी जम्मा ९ महिनाको लागि गठन हुने सरकारबाट जनताले के आशा राख्ने ? देशको विकासका लागि कम्तिमा ५ वर्ष सम्मका लागि स्थायी सरकारको आवश्यकता भैरहेको आजको परिस्थितीमा नेपालको शासन व्यवस्था अस्थिरतातर्फ धकेलिरहेको छ । यही सेरोफेरोमा द नेपाली टाइम्स अष्ट्रेलियाका नेपाल प्रतिनिधि कृष्ण भट्टराईले केही नेपाली सेलिब्रेटीहरुलाई ९ महिनाका लागि गठन भएको सरकारबाट के आशा राख्नु भएको छ ? भन्ने जिज्ञासा राखेका छन् ।

मञ्जु कार्की, मेकअप आर्टिष्ट
गर्न चाहने हो भने त यो छोटो अवधिमा पनि धेरै कुरा गर्न सकिन्छ तर सरकार गठन भएको पहिलो महिनामा खासै उपलब्धिमूलक कामको थालनी भएको देखिंदैन । त्यही पनि अझै ८ महिना बाँकि छ, हेरौं केही भैहाल्छ कि ?

धीरज तण्डुकार, कोरियोग्राफर
अघिल्लो सरकारले गरेका राम्रा–राम्रा कामहरुलाई निरन्तरता दिने हो भने त ९ महिनाको अवधिमा पनि धेरै कुरा गर्न सकिन्छ, तर खै अहिले सम्म यो नयाँ सरकारले त्यो सम्भावना देखाएको छैन ।

बबिता ढकाल, प्रिन्सिपल
यति छोटो अवधिको लागि गठन भएको सरकारबाट खै के आशा राख्नु ? यो सरकारले आफ्ना कार्यकर्तालाई केही महिनाका लागि भए पनि राम्रो ठाउँमा जागिर खुवाउनु बाहेक अरु केही गर्ला जस्तो लाग्दैन ।

कन्हैया सिंह, गायक
९–९ महिनामा नयाँ सरकार गठन हुने जुन शैली विस्तार भएको छ, यसलाई त म राम्रो मान्दिन किनभने ९ महिनामा कुनै पनि सरकारले धेरै काम गर्न सक्छ जस्तो लाग्दैन । अस्थिर सरकारबाट जनताल धेरै आशा गर्न पनि सक्दैनन् ।

अञ्जना गुरुङ, गायिका
छोटो अविधका लागि गठन भएको सरकाराबाट के नै आशा गर्न सकिएला र ? सरकार गठन भएको एक महिना बितिसक्दा पनि मन्त्रीमण्डलले पूर्णता पाउन सकेको छैन, पूर्णता पाउनै ६ महिना लाग्न जस्तो छ । यस्तो सरकारबाट मैले त धेरै आशा गरेकै छैन ।

अशिष्मा नकर्मी, नायिका
जनताका लागि केही गर्छु भन्ने पार्टिको नेतृत्वमा सरकार बनेको छ, त्यसैले यो सरकारबाट थोरै भए पनि आशावादी छु । तर एउटा सरकारको आयु ९ महिनाको साटो कम्तिमा ३ वर्ष पारिनु पर्छ भन्ने लागेको छ ।

पवित्रा आचार्य, नायिका
प्रधानमन्त्री पुष्पकमल दाहालका भनाइहरु सुन्ने हो भने त यो सरकारबाट धेरै नै आशा गर्न सकिन्छ तर कतिपय विकासका योजनाहरु ९ महिनामै पुरा नहुने भएकाले यो सरकारले धेरै कुरा गर्न सक्छ जस्तो लाग्दैन । अघिल्लो सरकारले प्रारम्भ गरेका सम्पूर्ण योजनाहरुलाई निरन्तरता दिनु नै नयाँ बन्ने सरकारको प्रमुख दायित्य बनाउन सकियो भने मात्र ९ महिने सरकारबाट पनि धेरै आशा गर्न सकिन्छ ।