काठमाडौं— आज शुक्रवारदेखि प्रदर्शन भएको फिल्म ‘राधा’ तथा आगामी शुक्रवारदेखि प्रदर्शन हुने चलचित्र ‘द विनर’ ले हिजो बिहिबार काठमाडौंमा दुई अलग–अगल सिनेमा हलमा प्रिमियर शो गरेका छन् ।

सिटी सेन्टरस्थित बिग मुभिजमा योगेश घिमिरेद्वारा निर्देशित फिल्म ‘राधा’ को प्रिमियरमा अभिनेता जीवन लुईंटेल तथा अभिनेत्री सञ्चिता लुईंटेल आकर्षणको केन्द्र बने । सञ्चारकर्मीको बाक्लो उपस्थितीमा अधिकांश फोटो पत्रकारहरु जीवन र सञ्चितालाई क्यामरा कैद गर्न व्यस्त देखिन्थे । पूर्वी नेपालका रमणीय लोकेशनमा छायांकन गरिएको यो फिल्म तिहारको अवसर पारेर देशभरी प्रदर्शन भएको हो ।

कुमारी हलमा आयोजित ‘द विनर’ को प्रिमियर शोमा भने अधिकांश नया अनुहार देखिए । महेशमान श्रेष्ठ, मञ्चिन शाक्य, मलिना जोशी, रेसु तामाङ, अमित गिरी आदि नया“ कलाकारले अभिनय गरेको यो फिल्मका अधिकांश छायांकन विदेशमा गरिएको छ । यो फिल्म कात्तिक १९ गतेदेखि प्रदर्शन हुनेछ ।

तस्बिरहरु : महेश प्रधान