काठमाडौं- नेपालको तीनदिने भ्रमणमा रहेका भारतका राष्ट्रपति प्रणव मुखर्जी जनकपुर पुगेका छन् । काठमाडौँबाट बुद्ध एअरको विमानबाट हिमाली शृङ्खलाको दृश्यावलोकन गर्दै आज अपराह्न जनकपुर विमानस्थल उत्रिदा राष्ट्रपति मुखर्जीलाई उपप्रधानमन्त्री एवम् गृहमन्त्री विमलेन्द्र निधि र धनुषाका प्रमुख जिल्ला अधिकारीले स्वागत अभिवादन गरेका थिए । राष्ट्रपति मुखर्जीले अहिले जनकपुरमा अवस्थित जानकी मन्दिरमा पूजाआजा गर्ने कार्यक्रम छ । साथै, उनले त्यहाँ ‘नागरिक अभिनन्दन’ ग्रहण गर्ने कार्यक्रम छ ।

नेपालको राजकीय भ्रमणमा रहेका भारतीय राष्ट्रपति प्रणव मुखर्जी आजै पोखरा जाने भएका छन् । कार्यक्रमअनुसार राष्ट्रपति मुखर्जी मध्याह्न १२ः४५ बजे पोखरा विमानस्थलमा पुग्ने पश्चिमाञ्चल क्षेत्रीय प्रशासक खगराज बरालले जानकारी दिए । पोखरा विमानस्थलमा राष्ट्रपति मुखर्जीलाई विमानस्थलको अतिविशिष्ट कक्षमा सङ्घीय मामिला तथा स्थानीय विकासमन्त्री हितराज पाण्डे, पश्चिमाञ्चल क्षेत्रीय प्रशासक खगराज बराल, पश्चिम पृतनापति जगदीशचन्द्र पोखरेल लगायतले स्वागत गर्नेछन् । क्षेत्रीय प्रशासक बरालका अनुसार पोखरा भ्रमणलाई भव्यरुपमा सफल बनाउनका लागि आवश्यक सम्पूर्ण तयारी सकिएको छ । राष्ट्रपति मुखर्जीलाई पोखरा विमानस्थलदेखि उनले केही समय आराम गर्ने विरौटास्थित पोखरा ग्रान्ड होटलसम्म विभिन्न टोल समुदायका सर्वसाधारणले स्वागत गर्नेछन् ।
त्यस्तै, विमानस्थलबाट राष्ट्रपति मुखर्जीले दिउँसो ३ बजे सम्बोधन गर्ने भारतीय पेन्सन क्याम्पसम्म विभिन्न जातजातिका सांस्कृतिक झाँकीसहित स्वागत गरिनेछ । भारतीय पेन्सन क्याम्पमा सम्बोधन गरेपछि काठमाडौँ फर्कने कार्यक्रम छ ।