बुटवल- नवलपरासीको बुलिङटार— ८ बतासामा शनिवार राति भएको जीप दुर्घटनामा सात जनाको मृत्यु भएको छ भने १८ जना घाइते भएका छन् । प्रहरी चौकी बुलिङटारका अनुसारका दलदलेबाट डाँडाझेरीको छरछरे जाँदै गरेको ग १ ज ३६३२ नम्बरको जीप दुर्घटना हुदा उनीहरुको निधन भएको हो ।
दुर्घटनामा परी निधन भएकाहरुमा डाँडाँझेरी छरछरेका २८ बर्षीय समन्ती बाचे, ५२ बर्षका खिमबहादुर बाचे, ४२ बर्षका लोकबहादुर बाचे, २२ बर्षका दीपक फाल, ४० बर्षकका जयबहादुर बाचे, ४९ बर्षका र रेश वहादुर बाचे र किशन बाचे छन् ।
बुलिङटार चौकीमा गाउँको झगडाका बिषयमा भएको घटनामा छलफल गरी फर्किएकाहरु दुर्घटनामा परेका हुन् ।
मान्छेको भीडमा जीपले ठक्कर दिदा धेरै जना घाईते भएको र मृत्यु भएको हुन सक्ने प्रहरीले अनुमान गरेको छ । जीप सडकबाट करिब दुईसय मिटर तल खसेको छ ।
पहाडी भू–भाग भएकाले दुर्घटना लगतै घाईतेहरुको उद्धार गर्न कठिनाई भएको थियो । आज आइतबार विहान मात्र घाइतेहरुलाई चितवनको भरतपुर मेडिकल कलेज र नारायणी सामुदायिक अस्पतालमा ल्याईएको छ ।
मृतकहरुलाई पोष्टमार्टका लागि प्राथमिक स्वास्थ्य केन्द्र दुम्कौलीमा राखिएको छ । एउटै गाउँका मान्छेहरु दुर्घटना परी ज्यान गुमाएपछि छरछरे गाउँ शोकमा डुबेको छ ।
मृत्यु हुने र घाइतेहुने गरी गाउँका अधिकांश घरका मान्छेहरु दुर्घटनामा परेका छन् । जीप चालक समेत गम्भीर घाईते भएका छन् । दुर्घटनास्थल पूर्वपश्चिम राजमार्गबाट ५० किलोमिटर उत्तरमा पर्छ ।