काठमाडौं- नायिका रेखा थापा राष्ट्रिय प्रजातन्त्र पार्टीमा प्रवेश गरेकी छिन् । निर्वाचनताका माओवादीबाट सभासदको उम्मेदवार बन्ने चर्चामा रहेकी नायिका रेखा थापा अन्ततः राप्रपामा प्रवेश गरेकी हुन् । नायिका थापालाई हिजो सोमबार काठमाडौंमा आयोजित एक समारोहमा राप्रपा अध्यक्ष कमल थापाले रेखालाई टीका र माला लगाएर पार्टी प्रवेश गराएका हुन ।
राप्रपाको विचार मन परेर प्रवेश गरेको नायिका थापाको प्रतिक्रिया छ । पार्टी प्रवेश कार्यक्रमलाई सम्बोधन गर्दै नायिका थापाले भनिन् —‘म हिन्दू नारी हुँ र राष्ट्रवादी केटी भएकाले राप्रपामा प्रवेश गर्न पाउँदा निकै ‘एक्साइटेड छु । राप्रपा मेरो पहिलो र अन्तिम राजनीतिक घर हो ।’
यसअघि माओवादीबाट सभासदमा उम्मेदवार बन्ने चर्चा भए पनि अहिलेसम्म कुनै पनि पार्टीको सदस्यता नलिएको बताईन् । नेपाली फिल्म हीरोबाट अभिनय यात्रा प्रारम्भ गरेकी थापाले वरमाला, सहारा, मेरो एउटा साथी छ, दमदार, कवच, हाम्रो माया जुनी जुनीलाई, साथी म तिम्रो, ए पण्डित बाजे, मितिनी, जीवन रेखा, हामी तिन भाई, क्रोध, नसिब आफ्नो, बाटुली, किस्मत, बाटो मुनिको फूल, तोड, कसले छोयो मेरो मन, हिफाजत, खुशी, इसारा, मेरो जीवन साथी, अन्दाज, लंका, रावण, काली, भिर, हिम्मतवाली, तथास्तु आदि दर्जनौं फिल्ममा अभिनय गरिसकेकी छिन् ।
नायिका थापा राप्रपामा प्रवेश गर्नुभन्दा केही दिनअघि मात्र सञ्चारकर्मी तथा गायिका कोमल वली पनि राप्रपामा प्रवेश गरेकी थिइन् ।