करिव पाँच वर्षदेखि अभिनय क्षेत्रमा सक्रिय कलाकार हुन् मञ्जिता केसी । म्युजिक भिडियोमा अभिनय गर्दै अभिनय यात्रा प्रारम्भ गर्ने मञ्जिताले यो अवधिमा दर्जनौं म्युजिक भिडियो, थुप्रै टेलिश्रृंखला तथा केही फिल्ममा अभिनय गरिसकेकी छिन् । लालबन्दी, सर्लाहीमा जन्मिएकी मञ्जिता सानै उमेरदेखि नृत्यमा पारंगत थिइन् । अहिले पनि उनी नृत्यका कारण स्वदेशदेखि विदेशसम्मका सांस्कृतिक कार्यक्रममा सहभागिता जनाइरहेकी छिन् । नेपाली क्रिकेटको विषयमा आधारित फिल्म ‘च्याम्पियन’ मार्फत फिल्ममा डेब्यू गरेकी मञ्जिता अहिले फिल्मसहित म्युजिक भिडियोमा समेत सक्रिय छन् । हप्तामा कम्तिमा एउटा म्युजिक भिडियोमा अभिनय गरिरहेकी मञ्जिता पहिलो फिल्मको सफलतासंग नायिकाको रुपमा स्थापित हुन सफल भएकोमा खुशी छिन् । फिल्मको तुलनामा म्युजिक भिडियोको अभिनय आर्थिक रुपले पनि आकर्षक भएको धारणा व्यक्त गर्ने मञ्जिता यूट्युब तथा टेलिभिजनमार्फत सिधै दर्शकसम्म पुग्न पाइने भएकाले म्युजिक भिडियोमा बढि नै समय दिएको तर्क गर्छिन् । पछिल्लो समय एउटा नयाँ गीतको म्युजिक भिडियो छायांकनस्थलमा भेटिएकी मञ्जितासंग द नेपाली टाइम्स अष्ट्रेलियाका नेपाल प्रतिनिधि कृष्ण भट्टराईको हट टक :

फिल्ममा भन्दा भिडियोमा बढि सक्रिय हुने कारण ?

फिल्ममा पनि सक्रिय नै छु । च्याम्यिपनपछि मैले थप दुई फिल्ममा काम गरिसकेकी छु । रिलिज डेट तय नभएकाले अहिले ती फिल्मको बारेमा बताउन मिल्दैन ।

हप्तामा दुई–तीन वटा भिडियो गरिरहनु भएको छ नि ?

म्युजिक भिडियो नै हामी कलाकारलाई व्यस्त बनाइरहने माध्यम भएको छ । एउटा भिडियोमा काम गर्नका लागि जम्मा एक दिन दिए पुग्छ । एक दिनको काम भए पनि पारिश्रमिक आकर्षक नै हुन्छ । त्यसैले हामीले भिडियोमा अभिनय नगरी सुखै छैन ।

भिडियोमा मात्र सक्रिय हुँदा फिल्म नपाउने सम्भावना हुँदैन ?

त्यस्तो हुँदैन । भिडियोमा सफल भएपछि राम्रा फिल्म पाउने सम्भावना अझ बढ्छ । यसबाहेक भिडियोको अभिनयले हामीलाई विदेशबाट सांस्कृतिक कार्यक्रमको प्रस्तावहरू आइरहन्छन् ।

नेपाली फिल्ममा कुन नायकसंग अनस्क्रिन रोमान्स गर्ने चाहाना छ ?

मलँई अभिनेता आर्यन सिग्देलको जोडिको रुपमा अभिनय गर्ने ठूलो चाहाना छ ।

मनपर्ने कलाकारहरू को को हुन् ?

मलाई राजेश हमाल तथा रेखा थापाको अभिनय मनपर्छ ।

जीवनमा सबैभन्दा खुशी भएको क्षण ?

एसएलसीमा प्रथम श्रेणीमा उत्तिर्ण भएको दिन ।

कुन कुराले दु:खी बनाउँछ ?

सोसल साइटमा फोटो अपलोड गरेपछि आउने नकारात्मक कमेन्टहरूले दु:खी बनाउँछ ।

सुन्दर हुनुहुन्छ, प्रेम प्रस्ताव त प्रसस्त आउलान् ?

म कक्षा ८ मा अध्ययनरत छँदै प्रेम प्रस्ताव आउन थालेका हुन् तर मैले आजसम्म कसैको प्रस्ताव पनि स्विकारेकी छैन् ।

प्रेम गर्ने बेला भएन र ?

अभिनयमा स्थापित भएपछि मात्रै प्रेमका बारेमा विचार गर्ने योजना छ । कम्तिमा दुई वर्ष म यो चक्करमा पर्दिन ।

तपाईंको विचारमा प्रेम सफल हुन के कुरा आवश्यक छ ?

प्रेममा इमान्दारिता सबैभन्दा महत्त्वपूर्ण कुरा हो । प्रेममा इमान्दार हुन सकिएन भने त्यो प्रेम क्षणिक हुन सक्छ ।

प्रेममा यौनको भूमिका कस्तो रहन्छ ?

प्रेममा यौनको भूमिका महत्वपूर्ण हुनु पर्छ तर अहिलको प्रेममा भावना कम वासना बढि देखिने गरेको छ । यही कुरा बुझेर नै म प्रेम सम्बन्धबाट पछि हटेकी हुँ ।