काठमाडौं- वरिष्ठ गायक पन्नाकाजी शाक्यको ८३ वर्षको उमेरमा काठमाडौंमा निधन भएको छ । टेकु, काठमाडौंस्थित आफ्नै निवासमा बुधवार बिहान उनको निधन भएको हो । तिरीरी मुरली बज्यो वनैमा…गीत गायक पन्नाकाजी लामो सयमयदेखि बिरामी थिए ।
१९८८ पुस १५ गते काठमाडौंको ओमबहालमा जन्मिएका पन्नाकाजीले २००४ सालदेख गीत गाउन थालेका हुन् । उनले २००८ सालमा रेडियो नेपालमा पहिलो पटक गीत गाएका थिए भने २०१६ सालमा पहिलो गीत रेकर्ड गराएका थिए । २०२२ सालमा गायन प्रतियोगितामा उत्कृष्ट हुदै उनले स्वर्ण पदक समेत जितेका थिए । रेडियो नेपालमा जागिरे उनले २०४० सालपछि रेडियो छोडेका थिए ।
पन्नाकाजीको स्वरमा चार सयभन्दा धेरै गीतहरु रेकर्ड भउका छन् तर ती मध्ये करिव दुई सय गीतमात्र हाल उपलब्ध रहेको बताइन्छ ।
तिरिरी मुरली बज्यो वनैमा, किन किन तिम्रो तस्बिर मलाई निको लाग्छसहित पन्नाकाजीले गाएका थुप्रै गीतहरु लोकप्रिय छन् । तिरिरी मुरली बज्यो…गीतलाई पन्नाकाजीका गायक छोरा प्रवेशमान शाक्यले आफ्नो स्वरमा पनि रेकर्ड गराएका छन् ।
मविवि शाहको शब्दको ‘किन किन तिम्रो तस्बिर मलाई निको लाग्छ गीत सबैभन्दा पहिले उनले नै गाएका हुन् । उनले रेकर्ड गरेपछि मात्र गुलाम अलिको स्वरमा उक्त गीत रेकर्ड भएको थियो ।
पन्नाकाजीका चार छोरा र एक छोरी छन् । दुई छोरा सांगीतिक क्षेत्रमा सक्रिय छन् । पन्नाकाजीको बुधबार नै अन्त्येष्टि गरिने बताइएको छ ।