केही म्युजिक भिडियो तथा दुई वटा नेपाली फिल्ममा मात्र अभिनय गरेकी अभिनेत्री हुन् मरिष्का पोखरेल । थोरै चलचित्रम काम गरेर धेरै चर्चा पाउने अभिनेत्रीको रुपमा स्थापित मरिष्काले ‘के म तिम्रो होइन र’ तथा ‘चपली हाइट–२’ मा अभिनय गरेर आफूलाई स्थापित अभिनेत्री बनाइसकेकी छिन् । केही हप्तापछि छायांकन प्रारम्भ हुने ‘लम्फू’ मरिष्काको तेस्रो फिल्म हुने छ । लामो समय जापानमा बिताएकी मरिष्काले त्यहाँ रहँदा आर्ट टिचरको रुपमा काम गरेकी थिइन् । आमाको स्वास्थमा समस्या आएपछि नेपाल फर्किएकी मरिष्का नेपाली फिल्ममा सक्रिय भएपछि यही क्षेत्रमा रमाइरहेकी छिन् । ‘लम्फू’ को वर्कसपमा व्यस्त रहेकी मरिष्कासंग द नेपाली टाइम्स अष्ट्रेलियाका नेपाल प्रतिनिधि कृष्ण भट्टराईको हट टक :

फिल्म रमाइलो कि मोडलिङ ?

म दुबै विधामा उत्तिकै रमाएकी छु । मोडलिङबाट फिल्ममा आएकाले यी दुई मध्ये एउटा विधामा छनोट गर्न गाह्रो छ ।

करियर चाहिं कुन विधामा बनाउने ?

दुबै विधा एक–अर्काका परिपुरक छन् । त्यसैले म मोडल तथा अभिनेत्रीको परिचयलाई एक साथ अघि बढाउँछ ।

म्युजिक भिडियोमा निकै कामुक देखिनु हुन्छ नि ?

दीपक गुरुङको गीत ‘म हराएँ…’ मा म केही हट देखिएँ भन्ने चर्चा चलेको थियो । वास्तवमा त्यसमा मैले सहज अभिनय गरेकी छु । त्यसलाई म भल्गर भन्दिन ।

नयाँ हुनुहुन्छ, बोल्ड दृष्य दिन असहज हुँदैन ?

कलाकार बनेर यो क्षेत्रमा आइसकेपछि नयाँ र पुरानो भन्ने केही पनि हुँदैन । कथाले जे माग्छ, हामीले त्यही गर्नु पर्छ । यसो भन्दैमा अनावश्यक ठाउँमा हामी जथाभावी एक्सपोज पनि हुँदैनौं ।

यौनलाई कसरी परिभाषित गर्नु हुन्छ ?

यो एउटा प्राकृतिक कुरा हो । यो भन्दा बढि म यसबारेमा जानकार छैन ।

तेस्रो फिल्मबाट कत्तिको उत्साहित हुनुहुन्छ ?

‘के म तिम्रो होइन र’ तथा ‘चपली हाइट–२’ पछि अब म तेस्रो फिल्म ‘लम्फू’ मा सक्रिय हुँदैछु । यो फिल्ममा मेरो भूमिका निकै चुनौतीपूर्ण छ । यो फिल्म रिलिज भएपछि मेरो करियरले गति लिन्छ भन्ने कुरामा विश्वस्त छु ।

‘चपली हाइट–२’ बाट कस्तो रेस्पोन्स पाउनु भयो ?

एउटा नौलो प्रयोग गरिएको फिल्म हो चपली हाइट–२ । दर्शकबाट पाएको सकारात्मक रेस्पोन्सकै कारण म अघि बढ्न सफल भएकी हुँ ।

फिल्म क्षेत्रमा बिताएको केही वर्षपछि यो क्षेत्रलाई कसरी मूल्यांकन गर्नु हुन्छ ?

विगतको तुलनामा नेपाली फिल्मले राम्रो प्रगति गरेका छन् । खासगरी नेपाल बाहिर समेत नेपाली फिल्मको माग बढ्नु हामी नेपाली कलाकारका लागि सुखद खबर हो ।

प्रेममा हुनु हुन्छ कि ?

छैन, म प्रेममा छैन । अहिलेसम्म म आफ्नो काममै रमाएकी छु ।

कस्तो विवाह गर्न चाहनुहुन्छ, प्रेम कि मागी ?

प्रेमसंगै मागी (लभ–एरेञ्ज) विवाहको पक्षमा छु ।

कस्ता युवकले आकर्षित गर्छन् ?

केयरिङ, हँसिलो तथा विशेष गरी मभन्दा अग्लो ।