काठमाडौं- सप्तरी घटनाको विरोधमा संघीय गठवन्धनले आगामी फागुन २७ गते शुक्रवार नेपाल बन्द गर्ने घोषणा गरेको छ ।
त्यसअघि, फागुन २६ गते बिहिबार काठमाडौं सहित देश भरका सदरमुकाममा विरोध सभा गर्ने निर्णय गरेको छ । गठवन्धनले ७ दिन भित्र आफ्ना २६ र ११ बुँदे माग पुरा नगरे सरकारलाई दिएको समर्थन फिर्ता लिने चेतावनी दिएको छ।

यस अघि सोमबार साँझ बसेको मधेसी मोर्चाको बैठकले आज सरकारलाई दिएको समर्थन फिर्ता लिने निर्णय गरेको थियो । मंगलबार बिहान प्रधानमन्त्री पुष्पकमल दाहालले मोर्चाका नेताहरु महन्थ ठाकुर, उपेन्द्र यादव र राजेन्द्र महतोलाई टेलिफोन गरेर समर्थन फिर्ता नलिन आग्रह गरेका थिए ।

प्रधानमन्त्रीले केही दिन भित्रै माग पुरा गर्ने आश्वासन दिएकोले मंगलबार लिने भनेको समर्थन फिर्ताको लागि ७ दिनको समय दिइएको सद्‍भावना पार्टीका महासचिव मनिष सुमनले बताए । गठवन्थनले सप्तरी घटनाको दोषीलाई कारबाही गर्न र घाइतेको उपचार गर्न सरकारसँग माग गरेको छ । गठवन्धनको मंगलबार बसेको बैठकले सप्तरी घटनाको निन्दा गरेको छ ।