धनगढी– कञ्चनपुरको पुनर्वास नगरपालिका–८ आनन्द बजारमा २२ वर्षीय गोविन्दप्रसाद गौतमको हिजो बिहिबार भारतीय सीमा सुरक्षा बल (एसएसबी) को गोली लागेर मृत्यु भएपछि सीमा क्षेत्रको तनाव कम गर्न नेपाल र भारतका अधिकारीबीच तीनबुँदे सहमति भएको छ ।
घटनापछि भारतको उत्तर प्रदेशको लखिमपुर खिरी जिल्लाका डिएम आकाश दीप र कञ्चनपुरका प्रमुख जिल्ला अधिकारी मनोहरप्रसाद खनालबीच भएको छलफलपछि तीन बुदे सहमति भएको हो ।
सहमति भएपछि सीमा क्षेत्रमा देखिएको तनाव पनि मन्थर भएको छ । दुई देशको विवादित सीमा क्षेत्रमा दुबै देशको संयुक्त सर्भे टोलीले रेखाङ्कन गरी सीमा विवाद हल गर्ने, एसएसबीको गोली प्रहाराबट नेपालीको मृत्यु भएको घटनाको छानबिन गरेर दोषीमाथि कारबाही र मृतकका परिवारलाई क्षतिपूर्ति दिने सहमति भएको कञ्चनपुरका प्रजिअ खनालले जानकारी दिएका छन् ।
स्थानीयस्तरमा देखिने सीमा समस्या नेपाली सशस्त्र प्रहरी र एसएसबीले समन्वय गरेर हल गर्ने तथा माथिल्लो निकायमा विवादबारे समयमै जानकारी गराउने पनि सहमति भएको छ ।
यसअघि नेपाली भूमिका कल्भर्ट बनाउने क्रममा भारतीय सुरक्षाकर्मीले अवरोध उत्पन्न गर्न थालेपछि हिजो बिहानदेखि त्यहाको स्थिती तनावग्रस्थ थियो । विवाद बढ्दै गएपछि भारतीय प्रहरीले चलाएको गोली लागेर एक जना नेपालीको मृत्युपछि उक्त क्षेत्र थप तनाबग्रस्त बनेको थियो ।