काठमाडौं–संयुक्त लोकतान्त्रिक मधेसी मोर्चाले संविधान संशोधनको नयाँ प्रस्तावले आफुहरुको माग थप बेवास्ता गरेको भन्दै स्थानीय तह निर्वाचनमा सहभागी नहुने निर्णय गरेको छ ।
गत मंसिर १४ गते ल्याएको प्रस्तावबाट थप पछि हट्दै सरकारले हिजो अर्को विधेयक ल्याएको मोर्चाको निश्कर्ष छ । मोर्चाको प्रमुख माग प्रदेश सीमांकन हेरफेरको प्रस्तावलाई थाँती राख्दै सरकारले हिजोमात्र पुरानो विधेयक फिर्ता लिएर नयाँ प्रस्ताव दर्ता गराएको थियो ।
तराई मधेस लोकतान्त्रिक पार्टीको मुख्यालयमा तीन घण्टायता जारी बैठकले सरकारले हिजो संसद सचिवालयमा दर्ता गरेको विधेयकले मोर्चाको मुख्य माग सीमांकनलाई सम्बोधन नगरेकाले स्विकार गर्न नसक्ने निश्कर्ष निकालेको हो ।
पुरानो विधेयकमा उल्लेखित नागरिकता, राष्ट्रिय सभा, भाषाको विषय परिमार्जन नगरिएको भन्दै नयां विधेयकको स्वामित्व नलिने निश्कर्ष निकालेको मधेशी जनअधिकार फोरम गणतान्त्रिकका अध्यक्ष राजकिशोर यादवले जानकारी दिनुभयो ।
नयां विधेयकको मस्यौदा निर्माणका समय आफुहरुसंग कुनै छलफल नगरेको मधेशी मोर्चाले स्पष्ट पारेको छ । मोर्चा शीर्ष नेता र सत्तारुढ दलबीचको कार्यदलमा भएको समझदारीभन्दा विधेयक फरक देखिएको मोर्चाले ठहर गरेको अध्यक्ष यादवले बताउनुभयो ।
जारी बैठकबाटै आगामी बैशाख ३१ गतेका लागि तय स्थानीय तह निर्वाचन बहिष्कार गर्दै आन्दोलनका नयाँ कार्यक्रम घोषणा गर्ने मोर्चाको तयारी छ । बैठकमा मधेसी मोर्चाआवद्ध ६ दलका अध्यक्षको सहभागीता छ । राष्ट्रिय मधेय समाजवादी पार्टीका अध्यक्ष शरतसिंह भण्डारी भने उपत्यका बाहिर हुनुहुन्छ । मोर्चाको बैठक सकिएपछि आजै संघीय गठबन्धनको बैठक बस्ने तयारी छ ।