काठमाडौं- प्रमुख प्रतिपक्ष दल नेकपा एमालेले दुई चरणको निर्वाचन घोषणा भएको अवस्थामा पहिलो चरणको निर्वाचनको मतगणना तत्काल गर्ने र बजेट प्रस्तुत गर्न अनुमति दिने निर्वाचन आयोगको निर्णयप्रति अपत्ति जनाएको छ ।
एमाले संसदीय दलका उपनेता सुवास नेम्वाङको नेतृत्वमा रहेको प्रतिनिधि मण्डलले प्रमुख निर्वाचन आयुक्त डा. अयोधिप्रसाद यादव र आयुक्तहरुलाई भेटेर पहिलो चरणको निर्वाचनको तत्काल मतगणना गरिँदा दोस्रो चरणको निर्वाचनलाई असर तुल्याउने भएकाले निर्वाचनको निष्पक्षता र विश्वसनीयतालाई ध्यान दिन सुझाव दिएको छ ।
सरकार र आयोगले एमालेसँग कुनै सोधपुछ र परामर्श नै नगरी किन लामो अन्तर राखेर दुई चरणमा निर्वाचन घोषणा भयो भनी प्रतिनिधिमण्डलले विरोध जनाएको थियो । टोलीले निर्वाचनको स्वच्छता, निस्पक्षताको सुन्दरताको जर्गेना गर्ने प्रमुख दायित्व आयोगको भएको पनि स्मरण गरायो ।
दुई चरणमा निर्वाचन घोषणा भएकोप्रति गुनासो व्यक्त गर्दै दोस्रो चरणको निर्वाचनको लागि घोषणा भएको मितिसमेत गलत भएको प्रतिनिधिमण्डलले जनाएको छ ।
छलफलपछि सञ्चारकर्मीसँग कुराकानी गर्दै उपनेता नेम्वाङले निर्वाचन स्वच्छ, निष्पक्ष र पवित्र हुनुपर्छ भन्ने मान्यता ठुलो हो की मतपेटिका लामो समयसम्म कसरी राख्ने भन्ने कुरा ठुलो हो ? भन्ने जिज्ञासा राखेका छन् ।
दुई चरणको निर्वाचन घोषणा भएको अवस्थामा आचारसंहिता विपरीत १५ जेठमा बजेट घोषणा गर्ने काम ठिक नहुने जिकिर गर्दै उनले मुलुक निर्वाचनमय भएको हुँदा अब स्थानीय तहको सङ्ख्या बढाइए एमालेका लागि मान्य नहुने धारणा राखेका छन् ।