काठमाडौं- प्रधानमन्त्री पुष्पकमल दाहालले आफ्नो पदबाट राजीनामा दिनु भएको छ । अहिले दिउँसो प्रधानमन्त्री तथा मन्त्रिपरिषद्को कार्यालय सिंहदबारबाट राष्ट्रका नाममा सम्बोधन गर्दै उहाले राजीनामा घोषणा गर्नु भएको हो । २०७३ साउन १९ गते संसदमा ३ सय ६३ को बहुमत प्राप्त गरी दाहाल दोस्रोपटक मुलुकको ३९औं प्रधानमन्त्रीका रुपमा निर्वाचित हुुनु भएको थियो । दाहाल २०६५ साल साउनमै पहिलो पटक प्रधानमन्त्री बन्नु भएको थियो ।
गत साउनमा सरकार गठन हुँदा नेपाली कांग्रेससँग भएको सहमतिबमोजिम प्रधानमन्त्री दाहालले पदबाट राजीनामा दिनु भएको हो । अब कांग्रेस–माओवादी केन्द्रको गठबन्धनबाट कांग्रेस सभापति शेरबहादुर देउवा प्रधानमन्त्री हुनु हुनेछ ।
सम्बोधनका क्रममा प्रधानमन्त्री दाहालले आफू नेतृत्वको सरकारले राजनीतिक, आर्थिक, सामाजिक र कूटनीतिक रुपमा रहेको समस्या र असमक्षदारी हटाएको बताउनु भयो ।
संविधान कार्यान्वयन स्वरुव स्थानीय तहको पहिलो चरणको निर्वाचन सम्पन्न भएको उल्लेख गर्नु भयो । प्रधानमन्त्री दाहालले शान्ति प्रक्रियाको काम, भूकम्पपछि पुनर्निर्माण र पीडितलाई राहत वितरण लगायतका कार्य गरेको बताउनु भयो । त्यस्तै तराई र मधेस आन्दोलनका क्रममा साहदत प्राप्त प्रहरी र नागरिकलाई सहिद घोषणा र राहत वितरणको कार्य गरिएको बताउनु भयो ।