काठमाडौं– पोखरा महानगरपालिकाको मेयरमा एमालेका मानबहादुर जिसी र उपमेयरमा एमालेकै मन्जुदेवी गुरुङ निर्वाचित भएका छन् । मेयरमा जिसीले कांग्रेस उमेदवार राजमी कुँवरभन्दा १४ हजार ७ मत बढी प्राप्त गरी निर्वाचित भए भने उपमेयरमा मन्जुले १२ हजार मत अन्तरमा कांग्रेस उमेदवार सरस्वती गुरुङलाई पराजित गरिन् ।
नतिजाको अन्तिम परिणाम अनुासर जिसीले ६०,४२३ मत प्राप्त गरे, उनका निकटतम प्रतिद्वन्द्वी कुँवरले ४६,४१६ मत पाए । उपमेयरमा एमालेका मन्जुले ५६ हजार ४४८ मत पाएकी छन् भने काग्रेस उमेदवार सरस्वतीले ४४ हजार ३३८ मत पाइन् ।
पोखरा महानगरमा कांग्रेस र माओवादीले गठबन्धन गरे पनि एमाले उमेदवारलाई हराउन सकेनन् ।
३३ वटा वडा रहेको पोखरामा २२ वटा वडामा एमालेले वडाध्यक्ष जितेको छ भने ११ वटा वडामा कांग्रेसले वडाध्यक्ष जितेको छ । चुनावी परिणाम आएपछि मेयरमा निर्वाचित जिसीले जनताको माया खेर जान नदिने प्रतिक्रिया दिए । उनले निर्वाचनअघि आफूले गरेको वाचा पुरा गर्ने प्रतिवद्धता गरेका छन् ।