काठमाडौं– प्रदेश नम्बर २ मा आज सोमबार स्थानिय तहका लागि निर्वाचन सम्पन्न हुँदैछ । तेस्रो चरणको यो निर्वाचनको सम्पूर्ण तयारी पुरा भैसकेको निर्वाचन आयोगले यसअघि नै जनाइसकेको छ ।
यसैबीच निर्वाचन आयोगले मतदाता नामावलीमा नाम भएरपनि फोटो सहितको परिचय पत्र प्राप्त गर्न नसक्ने मतदाताका लागि बैकल्पिक ब्यवस्था गरेको जनाएके छ । प्रदेश नम्बर २ का ८ जिल्लामा हुने स्थानीय तह निर्वाचनका लागि आयोगले सम्पूर्ण मतदाताको मताधिकार सुनिश्चित गर्न वैकल्पिक व्यवस्था गरेको जनाएको छ ।
मतदाताले कुनै कारणवश तस्बिरसहितको मतदाता परिचयपत्र प्राप्त गर्न नसकेमा अथवा प्राप्त गरेका मतदाताले परिचयपत्र हराएमा वा नष्ट भएमा सरकारी निकायबाट जारी भएको तस्बिरसहितको जुनकुनै परिचय पत्रका आधारमा मतदान गर्न सकिने स्पष्ट पारेको हो ।
नागरिकता, राहदानी, सवारी चालक अनुमति पत्र, २०७० सालमा आयोगले दिएको मतदाता परिचय पत्र, जग्गाधनी प्रमाण पत्र वा सरकारी निकायबाट जारी भएको तस्बिरसहितको परिचय पत्रका आधारमा मतदान गर्न सकिने आयोगले जनाएको छ ।
यद्यपी त्यसका लागि मतदाता नामावलीमा नाम हुनु पर्ने आयोगले स्पष्ट पारेको छ । मतदाता नामावली तथा मतदाता परिचयपत्रमा सामान्य त्रुटि पाइएमा स्थानीय तह निर्वाचन निर्देशिका, २०७३ को दफा ४८ बमोजिम सानोतिनो भूलचुक मानी निजको नागरिकता प्रमाणपत्रको विवरणलाई मूल आधार लिई मतदान गर्न दिने व्यवस्था मिलाउन समेत आयोगले सम्बन्धित सबैलाई जानकारी गराएको छ ।