काठमाडौं– गायक सञ्जिव सिंह आफ्नो ११ औं एकल एल्बम ‘गोरखपुर रेल’ लिएर दर्शक तथा स्रोतामाझ आएका छन् । एल्बमसंगै गायक सिंहले यसको टाइटल सङ गोरखपुर रेलको म्युजिक भिडियो पनि प्रिमियर गरेका छन्, जसको निर्माण अष्ट्रेलियामा गरिएको हो । अष्ट्रेलियाको ब्रिसबेनस्थित गोल्डेन टाइम्स मिडियाले उक्त भिडियो निर्मँण गरेको हो ।
लामो समयदेखि सांगीतिक क्षेत्रमा सक्रिय गायक सञ्जिव सिंहले आफ्नो ११ औं एकल गीति एल्बम ‘गोरखपुर रेल’ सार्वजनिक गरेका हुन् । स्टेरियो रेकर्ड्सले सोमबारदेखि यो एल्बम बजारमा उपलब्ध गराएको हो ।
एल्बममा गायक सञ्जिव सिंहकै शब्द तथा संगीतमा पाँच वटा गीत समावेश छन् । एल्बममा गोखरपुर रेल, अन्तिम गीत, कलाकारको बलात्कार, यो हावाले तथा सम्झना आइ रह्यो शीर्षकका गीतहरु सुन्न सकिन्छ ।
सुदिप सिंहद्वारा संगीत संयोजन गरिएका एल्बमका गीतहरु काठमाडौंको अनामनगरस्थित ट्यून्स ५८ स्टुडियोमा रेकर्डिष्टद्वय मानिक मान सिंह तथा सुरज लाल जोशीले रेकर्ड गरेका हुन् । एल्बमका गीतहरु सुरज लाल जोशीले मिक्सिङ गरेका हुन् ।
गायक सिंहले एकल एल्बमसंगै एल्बमको शीर्षक गीत ‘गोखरपुर रेल’ को म्युजिक भिडियो पनि प्रिमियर गरेका छन् । नेत्रजंग पाण्डेद्वारा निर्देशित उक्त म्युजिक भिडियोमा मिलन मिश्र तथा अर्पणा रानाभाटले अभिनय गरेका छन् । बिनोद केसीद्वारा छायांकन गरिएको भिडियोलाई सुरेश राउतले सम्पादन गरेका छन् ।
गायक सिंहले यसअघि आकाशबाट, सोल, बेस्ट अफ सञ्जिव सिंह, अल्वेज, सेलेक्टेड सञ्जिव, अनप्लग्ड, सेलेक्टेड सञ्जिव सिंह, मुग्लान, मैँच्याङ ज्यानमारा, तिमी र म जस्ता एकल गीति एल्बम सार्वजनिक गरिसकेका छन् ।

यस्तो छ गोरखपुर रेलको म्युजिक भिडियो