रौतहट– कलाकार सीताराम कट्टेल (धुर्मुस) तथा कुञ्जना घिमिरे (सुन्तली) ले रौतहटको चन्द्रपुरमा नमूना वस्ती निर्माण प्रारम्भ गरेका छन् । यो उनीहरुले निर्माण गरेको चौथो नमूना वस्ती हुनेछ ।
चन्द्रपुर नगरपालिका–८ सन्तपुरमा कलाकार दम्पतीले आज बुधवार एकीकृत नमूना सन्तपुर वस्तीको शिलान्यास गरेका छन् ।
रु ५ करोड ७५ लाखको लगानीमा ४५ वटा आवासीय घर निर्माण गरिने धुर्मुस–सुन्तली फाउण्डेशनले जनाएको छ । वस्तीका घरहरु बाढी र भूकम्प प्रतिरोधि हुनेछन् ।
धुर्मुसको जन्म दिनको अवसर पारेर शिलान्यास गरिएको वस्तीमा मुसहर, दुसाध र हजाम जातिको बसोबास हुनेछ ।
धारा, शौचालयसहितको सुविधासहितका चार कोठे ४५ घर, एउटा मन्दिर, सार्वजनिक शौचालय, सामुदायिक धारा, सामुदायिक भवन र भ्यू टावर सहितको वस्ती माघ महीनासम्म निर्माण सम्पन्न गरी २४ माघ बिहान ९ बजे हस्तान्तरण गर्ने सीताराम र कुञ्जनाले जानकारी दिए ।
वस्ती कुल १३ कठ्ठा क्षेत्रफलमा निर्माण हुनेछ ।
फाउण्डेशनले यसअघि काभ्रे पलाञ्चोक, सिन्धुपाल्चोक र महोत्तरीमा नमूना वस्ती निर्माण गरिसकेको छ ।