काठमाडौं– प्रतिनिधि सभा तथा प्रदेश सभा निर्वाचनका लागि हिमाली तथा पहाडी जिल्लामा आइतबार उत्साहपूर्ण रुपमा उम्मेदवारको मनोनयन दर्ता भएको छ ।
प्रतिनिधि सभातर्फ ३७ तथा प्रदेश सभातर्फ ७४ सिटका लागि विभिन्न राजनीतिक दलले नाराजुलुस र बाजागाजासहित उम्मेदवारी दर्ता गराएका हुन् ।
जाडो बढेपछि निर्वाचन गराउन कठिन हुने भन्दै निर्वाचन आयोगले हिमाली तथा पहाडी जिल्लामा पहिलो चरणको निर्वाचन मंसिर १० गतेका लागि निर्धारण गरेको छ ।
पहिलो चरणअन्तरगत १० मंसिरमा हुने प्रतिनिधिसभा र प्रदेशसभा निर्वाचनका लागि बाजागाजा सहित निर्वाचन अधिकृतको कार्यालय पुगेका उम्मेदवारहरुले मनोनयन दर्ता गरेका हुन् ।
पहिलो चरणको निर्वाचनमा प्रतिनिधि सभाका लागि राजनीतिक दल र स्वतन्त्र गरी ३ सय २० जनाले उम्मेदवारी दर्ता गराएको निर्वाचन आयोगले जनाएको छ । त्यसैगरी प्रदेशसभाका लागि ४ सय ८२ जनाको उम्मेदवारी परेको आयोगले जनाएको छ ।
नेपाली कांग्रेस नेतृत्वको लोकतान्त्रिक गठबन्धनमा राप्रपा, राप्रपा प्रजातान्त्रिक, संघीय समाजवादी फोरम नेपाल र नयां शक्ति रहेका छन् ।
नेकपा एमाले, माओवादी केन्द्र तथा जनमोर्चाले बामपन्थी गठबन्धन बनाएका छन् ।