काठमाडौं– निर्वाचन आयोगले आगामी मंसीरमा हुने प्रतिनिधिसभा र प्रदेशसभा सदस्य निर्वाचनको लागि ५२ स्वदेशी र चार विदेशी संस्थालाई पर्यवेक्षणको अनुमति दिएको छ ।
आयोगका अनुसार पर्यवेक्षणका लागि स्वदेशी संस्थाका ४४ हजार १४२ जनालाई पर्यवेक्षणका लागि अनुमति प्रदान गरिएको हो ।
राष्ट्रिय निर्वाचन पर्यवेक्षण समिति (नियोक) ले सबैभन्दा धेरै १० हजार तथा सिर्जनशील एकीकृत दिगो विकास समाजले सबैभन्दा कम २० जना पर्यवेक्षक खटाउन अनुमति पाएको छ ।
पर्यवेक्षकलाई लामो र छोटो अवधिका लागि अनुमति प्रदान गरिएको छ । लामो अवधिको अनुमति पाउनेले एउटा प्रदेश र छोटो अवधिको अनुमति पाउनेले एउटा जिल्लाको पर्यवेक्षण गर्न पाउने व्यवस्था गरिएको आयोगले जनाएको छ ।
पर्यवेक्षणको अनुमति पाउने अन्तर्राष्ट्रिय संस्थामा द कार्टर सेन्टर, युरोपेली संघ, एशियन नेटवर्क फर फ्री इलेक्सन र अनकावा इन्टरनेसले रहेका छन् ।
यूरोपेली संघले लामो अवधिमा १९ पर्यवेक्षक र कार्टर सेन्टरले पाँच पर्यवेक्षक खटाउने आयोगले जनाएको छ ।