काठमाडौं– सरकारले मुलुकको सुरक्षा व्यवस्था कडा भएको दाबी गरेको छ । यद्धपि काठमाडौं उपत्यकालगायतका स्थानमा भने सुरक्षा फितलो बन्दै गएको अनुभव गरिएको छ ।
विप्लवलगायतका समूहले राजधानीसहित देशभर बम विस्फोट गराउन थालेपछि सुरक्षा व्यवस्था कमजोर बन्दै गएको हो । प्रधानमन्त्री शेरबहादुर देउवाको घर नजिकै देउवा चोकमा शुक्रबार बम विस्फोट भएपछि सरकारले सुरक्षा व्यवस्था कमजोर हुँदै गएको आँकलन गरेको छ । राजधानीलगायतका स्थानमा सुरक्षा व्यवस्था कमजोर हुँदै गएपछि हिजो शनिबार निर्वाचन केन्द्रीय कमान्ड पोस्टको बैठक बसेको थियो ।
बैठकले राजधानीलगायत देशभरको सुरक्षा व्यवस्था कडा बनाएको जनाएको छ । गृह प्रवक्ता नारायण शर्मा दुवाडीले सुरक्षा व्यवस्था अत्यन्तै कडा पारेको दाबी गरेका छन् । उनका अनुसार चेकजाँच बढाइएको छ , ठाउँ–ठाउँमा गस्ती बढाइएको छ । हालसम्म बम राख्नेमाथि कारबाही गरेको जनाए तापनि कसले बम प्रहार गरेको हो भन्ने विषयमा भने उनले कुनै जानरका दिएका छैनन् ।
अधिकांश स्थानमा विप्लव माओवादीले बम विस्फोट गराइरहँदा गृह मन्त्रालयले भने अहिलेसम्म पहिचान गर्न नसकेको जनाएको छ । बैठकमा प्रहरी महानिरीक्षक प्रकाश अर्याल, सशस्त्र प्रहरी महानिरीक्षक सिंहबहादुर श्रेष्ठ, राष्ट्रिय अनुसन्धान र नेपाली सेनाका उच्च अधिकारीहरूको उपस्थिति रहेको थियो ।
शुक्रबार राजधानीको विभिन्न स्थानमा बम विस्फोटका घटना बढेपछि सुरक्षा निकायले राजधानीको सुरक्षा व्यवस्था कडा बनाएको छ । नाका–नाकामा सुरक्षा जाँच गरेको छ । सरकारले सिंहदरबार परिसरको सुरक्षा व्यवस्थामासमेत कडाइ गरेको छ ।
प्रहरीले हालसम्म बम विस्फोट गराउने घटनामा संलग्न ५ सय ६९ जनालाई पक्राउ गरेको जनाएको छ ।