अन्धेनैव नीयमाना यथान्धाः
नेपालको दोस्रो संविधान सभाले बनाएको नयाँ संविधानले नेपालमा लोकतान्त्रिक वा प्रजातान्त्रिक व्यवस्थाको प्रत्याभूति दिएको छ । संविधानले व्यवस्था गरेको संघीय संरचनामा सेवा प्रदायक संस्थाको रुपमा कार्यरत तीन प्रकारका सरकारको जुन व्यवस्था छ , जसले जनतालाई सेवा दिनका लागि केन्द्रीय सचिवालय सिंहदरबारलाई जनताको घर आँगनमा पु¥याएको मानिन्छ, तर तिनको समन्वयात्मक व्यवस्था सुरुदेखि नै खलबलिएको छ । व्यवस्था प्रजातान्त्रिक छ तर त्यसको सञ्चालन गर्ने चालकहरु प्रजातन्त्रप्रति विश्वास नगर्नेहरु छन् भन्ने राजनीतिक पर्यवेक्षकहरु ठान्दछन् । कारण हो, अहिलेका राजनीतिक चालकहरुको राजनीतिक दीक्षा प्रजातन्त्रप्रतिको निष्ठा र आस्था थिएन । रणनीतिकरुपमा प्रजातन्त्रको आवरणमा आफ्ना निहित उद्देश्य पूरा गर्नका लागि लागी परेको मानिन्छ ।
संघीय सरकारमा नेपाल कम्युनिस्ट पार्टी (नेकपा) वहुमतसहितको सरकार छ । सातओटा प्रदेशहरुमध्ये ६ ओटामा प्रचण्ड वहुमतसहितको नेकपाको सरकार छ । प्रदेश नंबर २मा पनि सरकारसँग कुनै न कुनै तरिकाले जोडिएका समाजवादी तथा राष्ट्रिय जनता पार्टीहरुको सरकार छ । अर्थात् पुरै प्रजातान्त्रिक तरिकाले बनेका संघीय संरचनाको जिम्मा कम्युनिस्ट पार्टीलाई छ । स्थानीय तहमा पनि वहुतायत सरकारमा नेकपाको वर्चस्व देखिन्छ ।
तीन तहका सरकार—केन्द्रीय वा संघीय सरकार, प्रादेशिक सरकार र स्थानीय सरकारका कतिपय अधिकार र कर्तव्यहरु दोहोरिएका छन् जसले गर्दा ती सरकारहरु आपसमा आफ्ना अधिकारका वारेमा अन्यौलग्रस्त देखिन्छन् । तिनको व्यवस्थापकीय चुस्तता देखिएको छैन ।
संघीय संरचनाको अभ्यासले मूर्तरुप लिन नसकेको अवस्थामा अन्ततः ती सबै अधिकार जति केन्द्रीय सरकारको भागमा पर्छ तर खासमा कार्यान्वयनचाहिँ स्थानीय सरकारले गरेको हुनुपर्छ । खासगरी उदाहरण दिन सकिने विषय हो— शिक्षाका वारेमा यो अन्यौलग्रस्त अवस्था देखिएको छ । शिक्षा तीन तहकै सरकारको भागमा संविधानले देखाएको छ तर कसको अधिकार कति अनि कसको कर्तव्य कति भनेर स्पष्ट हुन सकेको छैन । विद्यालय शिक्षामात्र होइन, उच्च शिक्षामा पनि यो नीति स्पष्ट देखिँदैन ।
सरकारका कुरा गर्दा संविधानले सरकारलाई सँसदप्रति जबाफदेही मानेको छ । संघीय संसद दुई सदनात्मक छ र पनि प्रतिनिधि सभाले मात्र सरकारको वारेमा निर्णय लिने अधिकार राख्छ, जबाफदेहिताको अधिकार तल्लो सदन अर्थात् प्रतिनिधि सभालाई सुम्पेको छ जवकि कानुन निर्माणका लागि माथिल्लो सदन अर्थात् राष्ट्रिय सभालाई पनि समावेश गरेको छ । संघीय संसद भन्नाले दुवै सदनलाई मानिएको भए पनि माथिल्लो सदनको भूमिका भनेको तल्लो सदनका कार्बाहीलाई मिहिन तरिकाले विश्लेषण र संश्लेषण गर्नेसम्मको हुनसक्छ । अर्थात् तल्लो सदनमा उत्पत्ति भई बनेका विधेयकहरुमाथि केही संशोधन वा टिप्पणी गर्नसक्छ । तल्लो सदनको अधिकारमाथि कुनै धावा बोल्न पनि सक्दैन र खासमा परिवर्तन चाहेन भने तल्लो सदनका काम कार्बाहीलाई बदल्न पनि सक्दैन । तर पनि तल्लो सदनलाई एकपटक पुनरावलोकन गर्ने संस्था भने देखिन्छ । तर प्रदेशमा त्यो पनि छैन । प्रदेश एक सदनात्मक छ र बहुमत प्राप्त दलले जे पारित गर्छ, त्यो प्रदेशमा लागू हुनसक्छ यदि यसमा संघीय संसदले हस्तक्षेप गरेन भने । हस्तक्षेप गरेन भने भनेको कारण के पनि हो भने कतिपय अधिकार दोहोरिएका छन् र दोहोरिने अधिकारको जिम्मा संघीय सरकारले आफ्नै तरिकाले व्यवस्थित गर्न खोजेको हुन्छ ।
प्रदेशका साँसदहरु पनि जनताबाट चुनिएकाले जनताका अति आवश्यक कुराहरुमा निर्णय लिन खोज्छन् तर संघीय सरकारको छायामा बाँच्नुपरेको अनुभूति भइरहेको पाइन्छ । दुई सदन नभए पनि प्रादेशिक संसदमा विपक्षीको संवैधानिक स्थान छ र संघीय वा प्रदेशमा सांसदहरुका लागि अनिवार्य दलको अनुमतिको व्यवस्था छ अर्थात् दल छोडेमा उसको पद पनि जान्छ । तर स्थानीय सरकार जसले जनताका सम्पूर्ण काम कार्बाही गर्नुपर्छ र केन्द्रीय नीतिसमेतको कार्यान्वयन गर्नु जरुरी छ, त्यहाँ दलीय अनुशासन देखिँदैन र कुनै स्थानीय तहमा निर्वाचित प्रतिनिधिले दल त्याग गरेमा पनि उसको पद सुरक्षित हुन्छ ।
अझ स्थानीय तहको विशेषता के पनि हो भने कार्यपालिका, न्यायपालिका र व्यवस्थापिका तीनओटै तहको अधिकार एकै ठाउँमा स्थापित छ तर त्यहाँ न त विपक्षी हुन्छ, न त स्थानीय सरकारलाई लगाम लगाउने कुनै संवैधानिक व्यवस्था देखिन्छ । अहिले यता केही समयदेखि स्थानीय तहको वडा एकाइसम्मको भ्रष्टाचारको मात्रा बढेको कुरामा महालेखा परीक्षक कार्यालय र अख्तियार दुरुपयोग अनुसन्धान आयोगको ध्यानाकर्षण भएको छ । थुप्रै भ्रष्टाचारका उजुरीहरु ती संवैधानिक संस्थाहरुमा पर्दा केन्द्रीय सरकार चलाउने दलले जबाफदेहिता लिन सकेको पाइँदैन ।
एकातिर सत्तारुढ दलको राजनीतिक दीक्षा एक दलीय स्वरुपको हुनु अनि अहिलेको नेकपा भनेको पुरानो एमाले र माओबादी केन्द्रका जरासन्धीय स्वभावले ग्रस्त हुनुले सरकारका काम कार्बाहीहरु कतातिर निर्देशित छन् भन्नेमा जहिले पनि संशय देखिन्छ । एकातिर प्रजातान्त्रिक शासन व्यवस्था देखाउनु पर्ने अर्कोतिर समाजवाद हुँदै साम्यवादसम्मको बाटो तय गर्ने राजनीतिक निहित उद्देश्य राख्नुले सम्पूर्ण शासकीय स्वरुप नै द्विविधाजन्य देखिन्छ । त्यसैले होला, नेकपाले लिने महत्वपूर्ण निर्णयहरु आफैँमा विवादास्पद र द्विविधाजन्य पाइन्छन् । वास्तवमा २०४७ साल यता नेकपा मात्रैको सोलोढोलो योजना र सरकारले काम गरेको थिएन । २०७४साल फागुन ३ गतेदेखि मात्र हो नेकपाले आफ्ना घोषित उद्देश्यहरुलाई योजनाबद्ध तरिकाले कार्यान्वयन गर्न थालेको । अन्यौल कस्तो देखिन्छ भने कहिले सरकार प्रजातान्त्रिक तरिकाले चल्न थालेको जस्तो, कहिले सरकार पार्टीले नियन्त्रण लिएको जस्तो त कहिले अन्यौलग्रस्त मानसिकतामा सरकार आफैँ चलिरहेको जस्तो ।
नेकपाको सरकार अन्यौलग्रस्त देखिदा के कुराको याद हुन्छ भने यो सरकारलाई प्रजातान्त्रिक सहिष्णुताको वारेमा खासै अभ्यास छैन । सरकार बनेदेखिका केही प्रयासहरु अप्रजातान्त्रिक तथा निरङ्कुशतातर्फको यात्राका प्रवेश विन्दु जस्ता लाग्छन् । खासगरी अभिव्यक्ति स्वतन्त्रता र सूचना प्रविधिका वारेमा देखिने संविधान प्रदत्त अधिकारको समेत हनन हुने प्रावधानप्रति बारम्बार गरिने लिंढेढिपीले आगामी दिनमा सरकारले गर्नसक्ने अप्रजातान्त्रिक कार्यहरुको छनक पाइन्छ ।
सायद यस्तै शासकीय स्वरुपको कल्पना गरेर उपनिषदमा भनिएको छः अन्धेनैव नीयमाना यथान्धाः । अर्थात् एउटा दृष्टिविहीनले अर्को दृष्टिविहीनलाई डो¥याएर हिँडेको अवस्था । त्यहाँ दुर्घटना अवश्यंभावी मानिएको छ । कठोपनिषदको नचिकेता र यमराजको प्रसङ्गमा यो कथा छ । अविद्यामा परेका जो मान्छे छन्, ती आफूलाई बडो बुद्धिमान र पण्डित ठान्दछन्, ती भोग गर्ने इच्छा भएका मूढ मान्छे दृष्टिविहीनले डो¥याएको दृष्टिविहीन मान्छे जस्तै चारैतिर ठक्कर खाँदै भड्किरहेका हुन्छन् ।
अविद्यायामन्तरे वर्तमानाः ।
स्वयम् धीराः पण्डितम्मन्यमानाः ।
दन्द्रम्यमाणाः परियन्ति मूढा
अन्धेनैव नीयमाना यथान्धाः ।।(कठोपनिषद १।२।५)
अहिलेको नेपालको सरकारलाई संविधानको प्रावधानअनुसार एकातिर प्रजातान्त्रिक व्यवस्थाको अभ्यास गर्नु परेको छ अनि अर्कोतिर प्रजातन्त्रको बहानामा एक दलीय स्वभावको शासन चरित्रको अभ्यास गर्नु छ । यो अन्यौलग्रस्त अवस्थामा मुलुक चलिरहेको पाइन्छ ।
यसका लागि नागरिक समाजको खबरदारी र विपक्षीको निरन्तर सजगता सहितको सतर्कता र प्रजातान्त्रिक अभ्यासमा देखिएको कमीप्रति तत्काल उपचारको आवश्यकता जरुरी छ । नेपालीहरुले बारम्बार प्रजातन्त्रका लागि संघर्ष गरेर प्राप्त भएको अहिलेको संघीय लोकतान्त्रिक संसदीय व्यवस्थाको तत्काल कुनै परिवर्तनको आवश्यकता पनि छैन र भएको शासकीय व्यवस्थाको इमान्दारिताका साथ अभ्यास र परिणामको पर्खाइ नै जरुरी छ ।
प्रजातन्त्रको विकल्प प्रजातन्त्रमात्रै हुनसक्छ, विकृतरुपमा प्रजातन्त्रको प्रयोगलाई मान्न सकिँदैन ।
काठमाडौं- नेपालले आगामी महिना अमेरिका र वेष्टइण्डिजमा हुने आईसीसी टी–२० विश्वकपका लागि...
काठमाडौं– अर्थमन्त्री वर्षमान पुनले तेश्रो अन्तर्राष्ट्रिय लगानी सम्मेलन–२०२४ भव्य रुपमा सफल भएको...
काठमाडौं- विगत चौबिस घण्टामा २२ जिल्लाका ६७ स्थानमा डढेलोले क्षति पुगेको छ...
इलाम– इलाम–२ मा मतगणनाको पछिल्लो परिणाम अनुसार नेकपा एमालेका सुहाङ नेम्वाङले ११...
काठमाडौं– फेशन नेटवर्क नेपालले नेपालमै पहिलो पटक तीन दिने ‘नेपाल फेसन फेस्टिभल’...
Are you currently worried your partner...
काठमाडौं- नेपालले आगामी महिना अमेरिका र वेष्टइण्डिजमा हुने आईसीसी टी–२० विश्वकपका लागि...
काठमाडौं– अर्थमन्त्री वर्षमान पुनले तेश्रो अन्तर्राष्ट्रिय लगानी सम्मेलन–२०२४ भव्य रुपमा सफल भएको...
काठमाडौं- विगत चौबिस घण्टामा २२ जिल्लाका ६७ स्थानमा डढेलोले क्षति पुगेको छ...
इलाम– इलाम–२ मा मतगणनाको पछिल्लो परिणाम अनुसार नेकपा एमालेका सुहाङ नेम्वाङले ११...