उत्तर पश्चिमी अफ्रिकी मुलुक जिबोटीको सामुद्रिक तटमा २ डुंगा डुब्दा १ सय ३० आप्रवासी बेपत्ता भएका अन्तर्राष्ट्रिय आप्रवासी संगठन (आइओएमले) जनाएको छ । आइओएमद्वारा जारी प्रेस विज्ञप्तिमा ‘जिबाटीको ओबोक क्षेत्र नजीकै जनवरी २९ का दिन  बिहान डुंगा डुब्दा कम्तीमा १ सय ३० आप्रवासी शरणार्थी डुबेर बेपत्ता भएका छन् ।’ आइओएमले २ जनालाई जीवितै उद्धार गरिएको र ३ महिलाको शव भेटिएको जनाएको छ । बेपत्ताहरूको खोजी कार्य जारी रहे पनि जीवितै हुने सम्भावना नरहेको आइओएमले जनाएको छ । बेपत्ता भएकाहरु कुन देशका थिए भन्नेबारे आइओएमले केही उल्लेख गरेको छैन । गरिब इथियोपियाली नागरिकले राम्रो आर्थिक अवसरको खोजीमा अरबेली प्रायद्वीपमा छिर्ने गरेका छन् । रेड सी पार गर्ने क्रममा डुबेर अथवा खानेपानीको अभावमा वर्षेनी हजारौ मानिसले ज्यान गुमाउने गरेका छन् । पछिल्ला वर्षमा इथियोपियाली सरकारले रेड सीको मार्ग प्रयोग गरेर यात्रा गर्दा जीवन खतरामा पर्नसक्ने भनी स्थानीय छापा तथा प्रशारण सञ्चारमाध्यममा दिने गरेका सचेतनामूलक विज्ञापनलाई हटाएका छन् ।