काठमाडौं- चीनको तिब्बतस्थित कैलाश मानसरोवर जाने भारतीय पर्यटकलाई शुल्क बढाएसँगै अहिले स्वदेशी पर्यटन व्यवसायी चिन्तित बनेका छन् ।

व्यवसायीले एक्कासि बढाइएको शुल्क वृद्धिले नेपालको बाटो हुँदै कैलाश पुग्ने भारतीय पर्यटकको संख्यासमेत निकै घट्ने भन्दै यसप्रति सरकार गम्भीर हुनुपर्ने बताएका छन् ।

नेपालको हुम्ला–सिमीकोट र रसुवाको केरुङ र ल्हात्सा हुँदै कैलाशयात्राका लागि जाने भारतीय पर्यटकलाई चीनको फरएन एक्सचेन्ज सेन्टरले एक्कासि त्यहाँ जाने रकम बढाएपछि नेपाली व्यवसायी चिन्तित बनेका हुन् ।

सेन्टरले भारतीय पर्यटकलाई प्रतिव्यक्ति ७८० अमेरिकी डलर एकैपटक बढाएको छ भने अन्य देशका पर्यटकका लागि शुल्क बढाइएको छैन ।

व्यवसायका लागि सुरुमा नै १ लाख अमेरिकी डलर धरौटी राख्नुपर्ने व्यवस्थासमेत गरेको छ । विदेशमा धरौटी राख्ने काम नेपालको कानुनले दिएको छैन ।

स्वदेशी पर्यटन व्यवसायीले हाल भारतीय पर्यटकलाई केरुङको बाटो हुँदै कैलाश पठाउँदा १ लाख ३० हजार भारतीय रुपैयाँ ल्हात्साको बाटो हुँदै कैलाश पठाउँदा २ लाख ३० हजार भारतीय रुपैयाँ र हुम्ला–सिमीकोट हुँदै कैलाश पठाउँदा १ लाख ७० हजार भारतीय रुपैयाँ लिँदै आएका थिए ।

चीनको फरएन एक्सचेन्ज सेन्टरले कैलाश जानका लागि रकम बढाएसँगै केरुङको बाटो हुँदै कैलाश पठाउँदा १ लाख ८५ हजार भारतीय रुपैयाँ, ल्हात्साको बाटो हुँदै कैलाश पठाउँदा ३ लाख १० हजार भारतीय रुपैयाँ र हुम्ला–सिमीकोट हुँदै कैलाश पठाउँदा २ लाख ६० हजार भारतीय रुपैयाँ तिनुपर्ने भएपछि समस्यामा परेका हुन् ।

श्री कैलाशयात्रा संघले मंगलबार धार्मिक पर्यटकको नाममा एक्कासि यतिधेरै शुल्क बढाएको भन्दै चीन सरकारसँग समन्वय गरी बढाएको शुल्क कम गर्न संस्कृति, पर्यटन तथा नागरिक उड्डयनमन्त्री योगेश भट्टराईलाई ज्ञापनपत्र बुझाएका छन् ।

मन्त्री भट्टराईले नेपाल भ्रमण वर्ष–२०२० को पूर्वसन्ध्यामा भारतीय पर्यटकका लागि एक्कासि रकम बढाउँदा भ्रमण वर्षमा असर पर्ने भन्दै यसका लागि कूटनीतिक पहल गर्ने बताए । उनले परराष्ट्र मन्त्रालयसँग समन्वय गरेर चाँडोभन्दा चाँडो समस्याको समाधान गर्ने बताए ।