भारतमा ‘पयक्कड’ पाइलटहरूको संख्या बढ्दै गएको तथ्यांक सार्वजनिक भएको छ । विमान उडान पहिले लिइने मादक पदार्थ सेवन परीक्षणमा पियक्कड पाइलटको संख्या बढेको भारतका नागरिक उड्डयन मन्त्री अशोक गजपतिले संसदमा जानकारी दिएका छन् । मन्त्री गजपतिका अनुसार सन् २०१६ मा जनवरी १ देखि ३१ अक्टुबरसम्म ३८ पाइलट र १ सय १३ क्याबिन क्रु मापसे परीक्षणमा फेल भएका हुन् । सन् २०१५ को पूरै अवधिमा मापसे परीक्षणमा फेल भएका पाइलटको संख्या ४० थियो । जबकि २०१४ मा यो संख्या २० मात्र थियो । एयर इण्डियाका पूर्व अधिकारी अशोक शर्माले यो तथ्यांक खतरनाक संकेत भएको बताए । उनका अनुसार पहिला पाइलट र क्याबिन क्रुले बिहान सबेरै उडान भर्न‘पर्ने अवस्थामा आधिकारिक पार्टीमा समेत मदिरा सेवन अस्वीकार गर्ने गरेका थिए । भारतमा उडानको १२ घण्टा पहिले पाइलट र क्याबिन क्रुले ६० मिलिलिटरभन्दा बढी मदिरा सेवन गर्न नहुने नियम छ । उडानअघिको परीक्षणमा पोजिटिभ रिजल्ट आयो भने २० मिनेटपछि पुन: परीक्षण गरिन्छ । विमानस्थलमा मेडिकल स्टाफले एक प्रत्यक्षदर्शीको उपस्थितिमा गर्ने मापसे परीक्षणमा पाइटल फेल भए लाइसेन्स तीन महिनाका लागि निलम्बन गरिन्छ । दोस्रोपटक पनि मापसे परीक्षणमा फेल भएमा लाइसेन्स तीन वर्षका लागि निलम्बन गरिन्छ । तेस्रोपटकको गल्तीमा सदाका लागि लाइसेन्स खारेज गर्ने प्रावधान छ । भारतमा गत वर्ष मापसे परीक्षण गर्दा भिडियो रेकर्डिङ गर्ने प्रावधान पनि राखिएको थियो ।