काठमाडौं— सरकारले स्थानीय तह निर्धारण आयोगको प्रतिवेदन राजपत्रमा प्रकाशित गरेको छ । नयाँ संविधानअनुसार स्थानीय तह निर्धारण आयोगले बनाएको प्रतिवेदन परिमार्जनसहित सरकारले राजपत्रमा प्रकाशित गरेको हो ।

संविधानअनुसार यो प्रतिवेदन प्रकाशित भएपछि आजैदेखि स्थानीय तह खारेज हुन्छन् । गाउँ विकास समितिका कामकारबाही आजैदेखि अन्तरीम भएका छन् । स्थानीय निकायलाई हटाएर संविधानअनुरुप स्थानीय तह बनेपछि आजैदेखि कार्यान्वयनमा आएको हो ।

मन्त्रिपरिषदले यही फागुन २२ मा ७ सय ४४ स्थानीय तह हुनेगरी गरेको निर्णय आज राजपत्रमा प्रकाशित भएपछि कार्यान्वयनमा आएको छ ।

स्थानीय तहको नयाँ संरचनाअनुसार देशभरमा ४ वटा महानगरपालिका, १३ वटा उपमहानगरपालिका, २ सय ४६ नगरपालिका र ४ सय ८१ गाउँपालिका रहने छन् ।

सबै स्थानीय तहमा गरी ६ हजार ६ सय ८० वडा कायम भएका छन् । यसअघि नयाँ नगरपालीकाको घोषणापछि ३ हजार १ सय ५७ गाविस र २ सय १७ नगरपालिका कामय थिए ।

उपप्रधान एवं संघीय मामिला तथा स्थानीय विकासमन्त्री कमल थापाले मन्त्रालयमा काम गर्न सुरु गरेकै दिन राजपत्रमा सूचना प्रकाशित गरी नयाँ संरचना लागू भएको घोषणा गरेका हुन् ।