शेष घले र जमुना गुरुङ अष्ट्रेलियाका १ सय १ औं धनी 

-- नेपाली टाईम्स अस्ट्रेलिया ?>

नेपालको लम्जुङ्गमा जन्मिएर नब्बेको दशकमा अष्ट्रेलिया आएका शेष घले तथा जमुना गुरुङ यस बर्ष अष्ट्रेलियाको १ सय १ औं धनीको सुचीमा पर्न सफल बनेका छन् । अष्ट्रेलियाबाट प्रकाशित हुने आर्थिक पत्रिका बिआरडब्लुले प्रत्येक बर्ष अष्ट्रेलियाका धनी ब्यक्तिहरुको सुची सार्वजनिक गर्ने गर्दछ । उनीहरु यसबर्ष गतबर्षको भन्दा ५ स्थान माथि उक्लिन्दै १ सय १ र २ स्थानमा पर्न सफल बनेका छन् । हालै प्रकाशित सुची अनुसार घले दम्पती ६ सय ४७ मिलियन अष्ट्रेलियन डलर सहित उक्त स्थानमा परेका छन् । पत्रिकाका अनुसार उनीहरुको कुल सम्पती एक बर्षको अवधिमा १० दशमलव ४ प्रतिशतले बढेको छ । गतबर्ष १ सय ५ औं स्थानमा रहेका उनीहरुको कुल सम्पती ५ सय ८६ मिलियन डलर रहेको थियो ।

एनआरएनको केन्द्रिय अध्यक्ष रहेका घलेको मुख्य ब्यवसायको रुपमा मेलबर्नमा रहेको शैक्षिक संस्था मेलबर्न इन्ष्टिच्युट अफ टेक्नोलोजी हो भने त्यस बाहेक घरजग्गा लगायतका ब्यवसायमा समेत उनी सफल बनेका छन् । उनले मेलबर्नको भिक्टोरिया मार्केटमा दुईवटा भवनमा ४७० अर्पाटमेन्ट र २ सय १० कोठा भएको होटल निर्माणका लागि अनुमती लिइसकेको पत्रिकाले जनाएको छ । नेपालमा गएको महाभुकम्प पश्चात अधिकांश समय नेपालमै बिताएका उनीहरुले भुकम्प पिडितहरुलाई निर्माण गर्ने भनिएको १ हजार घर निर्माणमा लागिपरेका छन् । उनीहरुले नेपालमा पनि अरबौं रुपैयाको लागतमा होटल निर्माण शुरु गरिसकेका छन् ।
करिब दुई दशकअघि बिद्यार्थीको रुपमा आएका घलेले शुरुवाती समयमा सामान्य बिद्यार्थी सरह नै काम गरेका थिए । उनले ब्यवसायलाई एकै स्थानमा केन्द्रित गर्नुभन्दा पनि विविधता दिनसक्नुपर्ने बताएका थिए । आफुले गरेको काममा लगन र विश्वास र मेहनतका साथ लागिपर्ने हो भने सफलता हात लाग्ने सुनाएका थिए । घलेको शैक्षिक संस्था एमआइटीमा विजनेश, आइटी, एकाउन्टिङ्ग लगायतका विषयमा स्वदेशी र विदेशी गरेर सयौं बिद्यार्थीहरु अध्ययनरत रहेका छन् ।