काठमाडौं– स्पेशल ओलम्पिक नेपा ले शुक्रवार तथा शनिवार काठमाडौंमा विकासात्मक बौद्धिक अपाङ्गता भएका व्यक्तिहरुको राष्ट्रिय खेलकुद प्रतियोगिता आयोजना गरेको छ ।
बौद्धिक अपाङ्गता भएका विभिन्न उमेर समुहका बालबालिका, किशोर–किशोरी तथा युवा–युवतीले दुई दिनसम्म दौड, रिले दौड, सफ्ट बल, लङ जम्प, सर्ट जम्प, हाइ जम्प, बुची आदि खेलमा प्रतिस्पर्धा गरेका थिए । विजेताहरुलाई शनिवार नै शिल्ड, मेडल तथा प्रमाणपत्र प्रदान गरिएको छ ।
काठमाडौंको हल्चोकस्थित सशस्त्र प्रहरीको खेल मैदानमा दुई दिनसम्म सञ्चालन भएको प्रतियोगितामा देशका विभिन्न १२ वटा विद्यालयमा अध्ययनरत बौद्धिक अपाङ्गता भएका झण्डै २ सय व्यक्तिहरुले भाग लिएको आयोजक संस्थाकी प्रोग्राम मेनेजर डा. नम्रता भट्टले बताएकी छिन् ।
आयोजक संस्थाकी अध्यक्ष डा.शिक्षिता श्रेष्ठका अनुसार विकासात्मक बौद्धिक अपांगता भएका व्यक्तिहरुलाई खेलकुदको माध्यमबाट स्वस्थ र क्रियाशील बनाउने काम गर्दै आएको स्पेशल ओलम्पिक नेपाले खेलकुदको विभिन्न विधामा देशका विभिन्न स्थानमा जिल्ला, क्षेत्रीय तथा राष्ट्रिय स्तरका प्रतियोगिताहरु सञ्चालन गर्दै आइरहेको छ । यसअघि गत वैशाख तथा जेठमा चैत महिनामा विराटनगर तथा पोखरामा सम्पन्न भएका दुई वटा क्षेत्रिय खेलकुद प्रतियोगिताका विजेतासहित काठमाडौंका विभिन्न विद्यालयहरुका बौद्धिक अपाङ्गता भएका व्यक्तिहरुले प्रतियोगितामा भाग लिएका थिए । सोही क्रममा विकासात्मक बौद्धिक अपाङ्गता भएका व्यक्तिहरुका लागि काठमाडौंमा राष्ट्रियस्तरको प्रतियोगिता सञ्चालन गरिएको हो ।
शनिवार सम्पन्न भएको प्रतियोगिताका विजेताले सन् २०१९ को मार्च महिनामा दुबईको आबुधाबीमा आयोजना हुने स्पेशल ओलम्पिक्स वल्र्ड गेम्स–२०१९ मा नेपालको प्रतिनिधित्व गर्नेछन् । एक साताभित्र आबुधाबी जाने खेलाडीहरुको नाम तय गरिने आयोजक संस्थाले जनाएको छ ।
यो राष्ट्रिय खेलकुद प्रतियोगिता सञ्चालन गर्नका लागि शसस्त्र प्रहरी बलले चौर उपलब्ध गराएको थियो भने इतिहाद एयरवेज, गोर्खा एस्थेटिक्स, डल्ले, नेप्लीज फेसन होम, लाइटिनिङ नेपाल तथा डाबर नेपालले प्रयाजन गरेका थिए ।