रोयल वेस्टर्न फुटबल क्लबको आयोजना तथा मेलबोर्न नेप्लिज कम्युनिटी वेस्टको संयोजनमा यही आउँदो अप्रिल १९ तारिख साइप्रस कम्युनिटी हलस्थित नयाँ वर्षको विशेष कार्यक्रम हुन लागेको हो । कर्मभूमिमा आफ्नो जन्मभूमिको नयाँ वर्षलाई पनि धुमधामसँग मनाउने हेतुले यस न्यू इयर धमाकाको आयोजना गरेको आयोजकको भनाइ रहेको छ ।
दुईदेखि तीनदशकसम्म यो कर्मभूमिमा विताएपनि आखिर मन त नेपाली नै हो र नेपालमा मनाएका हरेक चाडपर्व र अवसरहरुको झझल्को अझ पनि नमेटिएको हुनाले कुनै संकोचविना हरेक चाडपर्व रितीतिथि हेरेर मनाउन मन लागेको कुरा लामो समयदेखि मेलवनमा बस्ने नेपालीहरुले बताएका छन् । सायद यही कुराले सबैजना न्यू इयर धमाकाको लागि अति उत्साहित देखिन्छन् ।
कार्यक्रममा चर्चित लोक गायक बद्री पंगेनी, ‘भाइरल भइदियो’ गीत मार्फत एउटा छुटै पहिचान बनाउन सफल गायक तथा गीतकार मानस राज र स्टाण्डअप कमेडियन तथा क्यारिकेचरका लागि लोकप्रिय सुवोद गौतमको प्रस्तुति रहनेछ ।
उक्त कार्यक्रममा टिकट शुल्क १५ डलर रहेको छ भने विद्यार्थीहरुका लागि भने विशेष छुट शुल्क १० डलर रहनेछ । नेपालबाट आउनुभएका अभिभावक र बालबालिकाको लागि भने निःशुल्क प्रवेशको व्यवस्था गरिएको आयोजकले बताएको छ । एक्सपर्ट एडुकेसन एण्ड भिषा सर्भिसेसले प्रायोजना गरेको यस कार्यक्रममा नेपअस डान्स स्टुडियोको विशेष प्रस्तुति रहनेछ ।