ब्राजिलको एक कारागारमा जुलाई २९ का दिन दुई समूहबीच ग्याङ फाइट हुँदा ५७ जनाको मृत्यु भएको छ । पारा प्रान्तमा रहेको अल्टामिरा जेलमा भएको उक्त घटनामा १६ जना कैदीको घाँटी काटिएको र ४१ जनाको आगलागीका कारण निस्सासिएर मृत्यु भएको अधिकारीहरुले जनाएका छन् । स्थानिय समय अनुसार बिहान ७ बजेको नास्ता खाने समयमा कमान्डो भर्मेल्हो र कमान्डो क्लेस ए भन्ने दुई समूहबीच झडप भएको प्रान्तीय जेलर प्रमुख जरबास भासकोनसेलसले बताएका छन् । कमान्डो क्लेस ए समूहका केही व्यक्तिहरुले कमान्डो भर्मेल्हो समूहका व्यक्तिहरु राखिएको कोठामा आगो लगाइदिएपछि झडप भएको प्रान्त सरकारले जनाएको छ । करिव ५ घन्टापछि झडप नियन्त्रणमा लिइएको अधिकारीहरुले बताएका छन् । बन्दीको कब्जामा परेका दुई जेलअधिकारीहरु पनि मुक्त भएका छन् । उक्त जेलमा क्षमताभन्दा बढी कैदीहरु रहेको अधिकारीहरुले जनाएका छन् । ब्राजिलमा विश्वकै तेस्रो धेरै कैदीहरु छन् । त्यहाँ करिव ७ लाख ४ हजार कैदीहरु छन् । कैदीहरु धैरै भएका कारण ब्राजिलका जेलहरुमा भीडभाड हुने र झडप भइरहन्छन् । गत मेमा पनि विभिन्न कारागारमा झडप हुँदा ४० जना कैदी मारिएका थिए ।