दक्षिण कोरिया बिरामी तथा समस्यामा परेका नेपाली कामदारलाई उनीहरूका परिवारसंग मिलन गराउन तयार भएको छ । परिवारलाई कोरियामै बोलाउने व्यवस्था गर्न कोरिया सरकार सहमत भएको हो । नेपालका लागि कोरियाका राजदूत पार्क योङसिकले बिरामी र समस्यामा परेका कामदारका परिवारलाई कोरियामै भेट गराउने व्यवस्था मिलाइने बताएका हुन् । ‘कोरियामा कार्यरत सबै नेपालीलाई एकैपटक भेटाउन सकिँदैन । अहिले जो कामदार समस्यामा र बिरामी छन्, उनीहरूका परिवारसंग भेट गराउने प्रबन्ध मिलाइनेछ,’ राजदूत पार्कको भनाइ छ । राजदूत पार्कले श्रम, रोजगार तथा सामाजिक सुुरक्षामन्त्री गोकर्ण विष्टलाई भेटेर यसबारे जानकारी दिएका हुन् । कोरियामा कार्यरत नेपालीमा बढी मानसिक समस्या देखिएको भन्दै श्रम मन्त्रालयले परिवार मिलन गराउनका लागि कोरिया सरकारसमक्ष अनुरोध गर्दै आएको थियो । आकर्षक तलब पाउने भन्दै नेपाली युवापुस्ता कोरिया जान उत्साहित छ । सोचेभन्दा बढी काम गर्नुपर्ने भएकाले केही कामदारमा मानसिक समस्या देखिनुका साथै आत्महत्या दर बढिरहेको श्रम मन्त्रालयको बुझाइ छ । रोजगारका लागि अनुमति प्रणाली (ईपीएस) को अभिलेखअनुसार सन् २००८ देखि २०१७ सम्म दक्षिण कोरियामा ७७ नेपाली कामदारको मृत्यु भएको छ भने गत वर्ष मात्रै २१ जनाको मृत्यु भएको थियो । ती मध्ये ७ जनाले आत्महत्या गरेका थिए ।