बेलायतमा आयोजित नृत्य प्रतियोगिता ‘युके डान्स अफ–२०१८’ को उपाधि रजनी गुरुङले जितेकी छिन् । अल्डरसटस्थित प्रिन्सेस हलमा हालै सम्पन्न तेस्रो संस्करणको प्रतियोगितामा १२ प्रतिस्पर्धीलाई उछिनेर रजनीले उपाधि जितेकी हुन् । पब्लिक भोट पनि उनकै पक्षमा रह्यो । विजेता गुरुङलाई एनआरएनए युकेकी उपाध्यक्ष पुनम गुरुङ र कमल गुरुङ, एनआरएनए युकेका संरक्षक सूर्य गुरुङ, प्रतियोगिताका आयोजक सपनकुमार राई एवं मञ्जु गुरुङले १२ सय पाउन्ड नगद, प्रमाणपत्र र मेडल प्रदान गरे । प्रतियोगितामा बेनुका लिम्बूले दोस्रो तथा सिर्जना रायमाझीले तेस्रो स्थान हासिल गरे । प्रतियोगीले ‘स्वदेशको झल्को’ अन्तर्गत पहिलो चरणमा नेपाली गीतमा मात्र नृत्य गरे भने दोस्रो चरणमा ‘क्याच द रिदम’ मा आफ्नो रोजाइको गीतमा नृत्य गरेका थिए । प्रतियोगितामा नायिका मिरुना मगर, युके डान्स अफकी पूर्व विजेता जेनी सुनुवार र पर्चा प्रोडक्सनका समिर गुरुङ निर्णायक थिए भने पहिलो नेपाल आइडल बुद्ध लामा अतिथि निर्णायक थिए ।