एप्पलले आफुनो एपस्टोरबाट एक दिनमा अहिलेसम्मकै धेरै एप्लिकेसनहरु हटाउने कीर्तिमान कायम गरेको छ । एप्पलले आफ्नो चाइना स्टोरबाट बिहिबार ३९ हजार वटा गेम एप्लिकेसनहरु हटाइदिएको हो । लाइसेन्स लिनका लागि दिइएको डिसेम्बर ३१ सम्मको समयसीमामा पनि लाइसेन्स नलिएका गेम एपहरु एप्पलले चिनियाँ एपस्टोरबाट हटाइदिएको हो । लाइसेन्स विहिन गेम एप्लिकेसनहरुमाथि चिनियाँ सरकारले सुरु गरेको कारवाहीसंगै एप्पलले उक्त कदम अगाडि बढाएको बताइएको छ । चाइना स्टोरका ३९ हजार गेम एप्लिकेसनसंगै एप्पलले आफ्नो एप स्टोरबाट डिसेम्बर ३१ का दिन कूल ४६ हजार एपहरु हटाइदिएको छ । समाचार अनुसार यसरी हटाइएका गेमहरुमध्ये Assassin’s Creed Identity  तथा   NBA 2K20 लगायतका चर्चित गेम एपहरु समेत रहेका छन् । एप्पलको पछिल्लो कदमबाट एप स्टोरमा रहेका शीर्ष १५ सय सशुल्क एपहरुमध्ये केवल ७४ वटा मात्र बचेका छन् । एप स्टोरलाई सबैभन्दा ठूलो अनलाइन गेम मार्केट मानिन्छ । एप स्टोरमा कायम रहनका लागि गत जुनको अन्त्य सम्ममा सम्बन्धित सरकारले प्रदान गरेको लाइसेन्स पेश गर्न एप्पलले सबै गेम एप प्रकाशकहरुलाई अनुरोध गरेको थियो । पछि उक्त समयावधि डिसेम्बर ३१ सम्म लम्ब्याइएको थियो ।