अमेरिकाका वैज्ञानिकहरूले भूकम्प आउनुअगावै सूचना दिने एपको विकास गरेका छन् । भूकम्पका कारण धेरैले ज्यान गुमाउने खतरालाई मध्यनजर गर्दै उक्त एपको विकास भएको हो । ‘माइसेक’ नामको उक्त एपले भूकम्प आउनुअगावै सन्देश प्रवाह गर्ने वैज्ञानिहरूले बताएका छन् । यसले थोरै भए पनि धनजनको क्षति कम गर्न सकिने उनीहरूले दावी गरेका छन् । एपले मोबाइलको मोसन सेन्सरको मद्दतले जमिनमुनि भइरहेको हलचल पत्ता लगाउने काम गर्छ । मोबाइललाई खल्ती अथवा ब्याग जता राखे पनि जमिनमुनिको हलचललाई मापन गरिरहने वैज्ञानिकहरूको दावी छ । यो एपको विकासमा जुटेका प्रोफेसर रिचर्ड एलेनले बीबीसीसंग कुरा गर्दै हजारौं मोबाइल प्रयोगकर्ताको मद्दतले एउटा नेटवर्क विस्तार गर्न खाजेको बताए । जसले भविष्यमा आउनसक्ने भूकम्पबारे चेतावनी दिन सकियोस् । यो एप http://myshake.berkeley.edu/ बाट डाउनलोड गर्न सकिने एलेनले बताए । ठूलो तीव्रताको भूकम्प आउन केही समय लाग्ने र त्यसअघि नै जमिनको हलचल सुरु भइसक्ने हुँदा यसबारे सूचना प्रवाह गर्न सकिने दाबी गरिएको छ । यसले भूकम्पबाट हुनसक्ने खतरा महसुस गर्दै मानिसहरू सुरक्षित स्थानमा जान सक्नेछन् ।